OÉ-CUSSE, 07 fevereiru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Rogério Tiago Lobato, sei halo manutensaun ba barrajen tono, ne’ebé lokaliza iha aldeia Noeninen suku Cunha sub-rejiaun Pante Makasar.
Notísia relevante: Inundasaun iha Bobokase, Autoridade RAEOA sei hadi’a barrajen Tono
Prezidente Autoridade ne’e, hateten, kada tinan bee-mota tún fó perigu ba populasaun sira-ne’ebé hela iha suku Bobokase, Naimeko no Cunha, tanba estraga rate no uma hela fatin inklui to’os no natar sira.
Tán ne’e, nia orienta ona Sekretária Rejionál ba Asuntu Agrikultura, atu prepara relatóriu no proposta solusaun ida, kona-bá medida atu halo manutensaun.
“Entaun ita tenta buka solusaun ida atu fó solusaun, ohin ita mai ne’e importante atu haree, kurrije efeitu mota ne’e, tanba bee mai tama estraga komunidade sira-nia rai, haree mós barrajen ida-ne’e, atu oinsá bee ne’e bele tama fali ba natar sira, ne’ebé ha’u husu ona ba Sekretária Agrikultura, atu halo relatóriu ida proposta solusaun atu oinsá bele hadi’a barrajen ne’e, nune’e bee bele to’o natar sira,” Rogério Lobato, ko’alia iha Barrajen Tono, kuarta ne’e.
Autoridade másimu ne’e mós observa rai-henek ne’ebé akumula iha barrajen Tono, kualidade di’ak, bele utiliza hodi halo konstrusaun, maibé sistema ne’ebé uza atu loke portaun bee iha barrajen, sei uza sistema manuál.
“Ne’ebé ohin ami haree ona, bele substitui sistema ida ho eletrisidade de’it, atu fasilita ema-ne’ebé hein, kuandu rai nakukun ona iha foho, nia bele prepara daudaun atu loke, tanba ne’e investimetnu boot ba Oé-Cusse, entaun ita tenke halo medida atu fó solusaun ida di’ak,” nia promete.
Notísia relevante: Barrajen Tono benefísia natar ektare 1.717 iha Pante Makasar
Sekretária Rejionál ba Asuntu Agrikultura, Filomena Sila, sei kumpri orientasaun ne’e no atu prepara relatóriu no medida manutensaun.
“Ha’u simu ona orientasaun hosi Prezidente Autoridade atu halo relatóriu ida, kona-bá oinsá ita bele rezolve problema ne’ebé akontese iha barrajen ne’e, presiza halo manutensaun lalais, hodi bele monta idrolika ba odamatan bee-nian, nune’e bainhira mota tún bele lori hotu rai-henek no fatuk nune’e bele hamenus sedimentasaun iha barrajen laran.”
Entretantu, barrajan Tono benefísia natar ektare 1.717 hodi responde ba uma-kain kuaze 100 maka presiza ho bee ho aas metru 200 no bee dadoras rua, ida boot ho naruk kilómetru 26,5 no ida ki’ik nia naruk metru 2,6.
Barrajen Tono hahú funsiona dezde 2016 iha mandatu Antigu Prezidente Autoridade RAEOA, Mari Alkatiri, no konstrusaun ne’e konstrui ho orsamentu millaun $11-resin, ne’ebé ezekuta hosi kompañia internasionál Young-jing.
Notísia relevante:Autoridade RAEOA loke konkursu públiku reabilita barrajen Tono
Jornalista: Abílio Elo Nini
Editór: Evaristo Soares Martins
