OÉ-CUSSE, 08 novembru 2023 (TATOLI – Autoridade Rejiaun Administrativa Espesiál Oé-Cusse Ambeno (RAEOA) daudaun ne’e loke konkursu públiku atu reabilita barrajen (bendungan) Tono, ne’ebé lokaliza iha aldeia Noeninen, suku Cunha, sub-rejiaun Pante Makasar.
Notísia relevante: Inundasaun iha Bobokase, Autoridade RAEOA sei hadi’a barrajen Tono
Sekretáriu Rejionál ba Asuntu Agrikultura, José Eta, hateten, kada tinan sedimentasaun aumenta, tan ne’e iha tinan ne’e, Diresaun Rejionál Agrikultura prevee orsamentu hosi Orsamentu Jerál Estadu (OJE) 2023 atu halo manutensaun ba barrajen Tono, nune’e bele hasai sedimentasaun iha barrajen laran.
“Ida-ne’e sei ajuda ita atu-bele hamenus risku dezastre iha fatin sira-ne’ebé besik, tanba manutensaun ne’e sei hadi’a mós odamatan sira-ne’ebé aat inklui asesoris balu, agora tenderizasaun (konkursu públiku) la’o hela,” José Eta, ba jornalista sira iha Oé-Cusse, kuarta ne’e.
Notísia relevante:Xanana Gusmão tulun agrikultór fornese bee ba natar Petun
José Eta, relembra kada tinan barrajen Tono, hamosu inundasaun estraga komunidade nia uma, plantasaun, natar sira no to’os, tanba iha barrajen ne’e, nakonu ho sedimentasaun. Nune’e iha tinan ne’e presiza hadi’a.
Entretantu, barrajen Tono benefísia natar ektare 1.717 hodi responde ba família uma-kain kuaze 100 mak presiza, ho bee batak ida ho aas metru 200 no bee dadoras rua, ida boot ho naruk kilómetru 26,5 no ida ki’ik nia naruk kilómetru 2,6.
Barrajen Tono hahú funsiona dezde 2016 iha mandatu Prezidente Autoridade RAEOA, Mari Alkatiri, no projetu ne’e konstrui ho orsamentu millaun $11-resin, ezekuta hosi kompañia internasionál Young-Jing.
Notísia relevante: http://Barrajen Tono benefisia natar ektare 1.717 iha Pante Makasar
Jornalista: Abílio Elo Nini
Editór: Evaristo Soares Martins
