OEKUSI, 02 Abríl 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago de Fátima Lobato, akompaña husi Sekretária Rejionál ba Asuntu Agrikultura, lansa kuda hare membramo ektare 15 iha natar Nunuheno, suku Cunha, sub-rejiaun Pante Makasar.
Biban ne’e, Prezidente Autoridade RAEOA, informa katak natar referida paradu tinan haat ona tanba hetan estragu husi inundasaun iha loron 04 Abríl 2021, bee tama estraga kanu no natar sira nakonu ho sedimentasaun (rai-henek) no husik hela to’o 2025 ne’e mak foin rezolve.
Notísia relevante:Agrikultura RAOEA fasilita tratór unidade haat bá fila-rai iha natar Nunuheno
Foto Tatoli,I.P/Abílio Elo Nini
“Ita nia esforsa liuhusi servisu agrikultura konsege hasai hotu sedimentasaun sira-ne’e no hadi’a fali kanu bee hodi bee bele tama ba natar sira, ohin iha lansa ona nune’e agrikultór sira bele kuda ona hare membramo ne’e,” Prezidente RAOEA Rogério Lobato, informa iha ámbitu lansamentu ne’e.
Autoridade RAEOA ne’e, promete ba agrikultór sira iha Nunuheno sei apoia adubu organiku AMO, nune’e bele hasa’e produsaun no hamate pesta lakataru.
“Adubu organiku AMO ne’e atu hasa’e produtividade hare Membramo ne’e husi tonelada 3 to’o 6 iha ektare ida, tanba ne’e Oekusi halo produsaun maka’as ba hare membramo kuda iha Citrana no fatin seluk tan, nune’e ita bele redús importasaun foos husi rai li’ur, Oekusi tenke sai auto-sufisiénte tanba rai bo’ot no bee iha,” nia informa.
Nia mós fó hanoin ba agrikultór sira iha natar Nunuheno katak bainhira kolleta hotu hare Membramo presiza kuda fali produtu ortikultura, nune’e bele habokur rai no tanba bee sufisiente atu fornese ba to’os modo sira.
Notísia relevante:Agrikultór natar suku Cunha hahú halai natar faze daruák
Iha fatin hanesan, Sekretária Rejionál ba Asuntu Agrikultura, Filomena Sila rekomenda ba natar na’in-sira atu koopera ho tékniku estensionista destaka iha suku atu apoia agrikultór sira tantu to’o rai maran, natar no to’os modo.
“Tanba natar ektare 15 ne’e ita aplika tékniku JLS atu bele hasa’e produsaun no fasilita natar na’in-sira bele hamos duut ho seguru. Tanba ita aplika JLS ne’e la’os de’it ba natar 15 ne’e maibé antes ne’e aplika ona iha fatin balun hatudu rezultadu di’ak, entaun ita kontinua implementa nafatin to’o agora,”, nia afirma.
Entretantu, Xefe suku Cunha, Domingos Seco Caunan, reprezentanta natar na’in-sira hato’o agradesimentu ba Governu tanba bele apoia ekipamentu hasai sedimentasaun no fasilita mós tratór ba agrikultór hodi halai natar.
“Natar sira-ne’e kuaze tinan lima ona abandona, dezde akontese inundasaun iha 04 Abríl 2021, depois rai henek tama taka tiha, maibé agradese ba Governu tanba tinan ne’e foin komesa fali, ne’ebé hetan apoia husi agrikultura RAEOA lori ekipamentu hasai sedimentasaun ne’e no apoia mós tratór fila rai ba natar sira-ne’e, ne’ebé ami hato’o agradese husu nafatin atu kontinua tau matan ba agrikultór sira,” nia orgullu
Notísia relevante:Projetu turizmu kulturál Nunuhenu atraza tanba disputa rai
Jornalista: Abílio Elo Nini
Editór: Florencio Miranda Ximenes
