Edukasaun Vikeke rejista estudante 2.965 atu partisipa iha ezame nasionál

VIKEKE, 09 Outubru 2026 (TATOLI)—Servisu Edukasaun Munisípiu Vikeke rejista ona estudante finalista hamutuk na’in-2.965 husi Ensinu Báziku Sentrál (EBC-sigla portugeza), Ensinu Sekundáriu no Ensinu Sekundáriu Tékniku-Vokasionál (ESTV), ne’ebé sei partisipa iha ezame nasionál iha 19 Outubru 2026.

Diretór Servisu Edukasaun Munisípiu Vikeke, António Pinto da Silva, hatete katak preparasaun ba ezame nasionál iha munisípiu ne’e la’o ona, inklui distribuisaun matriz ezame nian ba estudante sira liuhusi eskola idaidak.

“Preparasaun ba ezame nasionál hala’o ona. Eskola sira fahe ona matriz ezame nian ba estudante sira. Ami sei distribui tan manuál ezame nian ba estudante sira nune’e sira bele estuda no prepara an atu hasoru ezame nasionál,” António Pinto da Silva hateten ba TATOLI iha Vikeke Vila, Sesta ne’e.

Nia hatutan katak, ba ezame nasionál tinan 2026, Servisu Edukasaun Munisípiu Vikeke sei aplika mudansa iha sistema atribuisaun profesór vizilante sira. Profesór sira-ne’ebé hanorin iha eskola ida sei hala’o kna’ar hanesan vizilante iha eskola seluk.

“Ba ezame nasionál tinan ida-ne’e, ita sei halo mudansa iha sistema vizilánsia nian. Ezemplu, profesór ne’ebé hanorin iha eskola ida sei bá hala’o kna’ar vizilante iha eskola seluk. Ida-ne’e atu garante transparénsia iha prosesu ezame nasionál, nune’e ezame bele la’o ho susesu,” nia dehan.

António Pinto da Silva esplika katak matéria ezame nasionál sei foti iha loron 16 Outubru. Iha loron 17 Outubru, pontu ezame sira sei to’o iha Munisípiu Vikeke, no iha loron 18 Outubru, Servisu Edukasaun sei transporta matéria ezame nian ba eskola sira.

Tuir dadus husi Servisu Edukasaun Munisípiu Vikeke, estudante finalista na’in-2.965 ne’ebé sei tuir ezame nasionál kompostu husi estudante EBC na’in-1.576, estudante Ensinu Sekundáriu na’in-1.282 no estudante ESTV na’in-107.

Husi estudante EBC na’in-1.576, estudante feto hamutuk na’in-787 no estudante mane na’in-789.

Enkuantu, husi estudante Ensinu Sekundáriu na’in-1.282, estudante na’in-735 tuir área Siénsia no Teknolojia, no estudante na’in-547 tuir área Siénsia Sosial no Umanidade.

Ba estudante ESTV iha na’in-107, estudante mane hamutuk na’in-66 no estudante feto na’in-41.

Jornalista: Vitorino Lopes da Costa

Editór: Xisto Freitas da Piedade