Komisaun D PN fiskaliza iha Oekusi no konfirma ezekusaun OJE 2026
OEKUSI, 08 Outubru 2026 (TATOLI) – Membru Komisaun D (trata asuntu ekonomia no dezenvolvimentu) Parlamentu Nasionál (PN), kinta ne’e, audénsia públika ho Autoridade Rejiaun Administrativa Espesiál Oekusi Ambeno (RAEOA) hodi halo fiskalizasaun ba programa prioridade tolu implementadu iha Oekusi hodi konfirma ho nia ezekusaun Orsamentu Jerál Estadu (OJE) 2026 nian.
Vise-Prezidente Komisaun D, Manuel Hendrique Noronha, informa, atividade tolu ne’ebé sai ajenda prinsipál iha fiskalizasaun ne’e maka, Sentru Produsaun Masin, irirgasaun sira no atividade pekuária nian.
“Ami koordena ho Autoridade RAEOA kuaze oras lima, ami ko’alia ho diretór sira relasaun ho komisaun D nia servisu, ami presiza hatene no observa nia rezultadu servisu sira, bazeia ezekusaun orsamentu no planu programa husi RAEOA nian,” nia hateten, ba jornalista sira iha salaun Alfándega Palaban, ohin.
Reprezentante povu iha uma-fukun Parlamentu Nasionál ne’e hateten, fiskalizasaun dahuluk sei haree Sentru Produsaun Masin iha suku Taiboko, daruak sei ba observa irrigasaun sira-ne’ebé antes ne’e Governu aloka orsamentu ba irrigasaun haat iha Oekusi, no iha 2025 Primeiru-Ministru halo ona inaugurasaun ba projetu irrigasaun sanolu (10).
“Ami presiza ba haree nia rezultadu, nia utilizasaun, benefísiu ba agrikultór sira di’ak lae, sufisiente ona ba natar sira ka la’e,” nia hateten.
Fiskalizasaun datoluk, maka sei haree implementasaun programa pekuária grupu haki’ak animál sira, hanesan fahi, bibi no karau, no haki’ak manu, tanba programa sira-ne’e hetan alokasaun husi Orsamentu Jerál Estadu (OJE) 2026 nian.
Ezekusaun OJE iha Oekusi pursentu sa’e ona
Prezidente Autoridade RAEOA, Régio da Cruz Salu, relata katak ezekusaun OJE 2026 ne’e, diresaun sira iha Oekusi maioria hatudu pursentu la’ós 19% maibé tama ona ba trimestre datoluk sa’e ona ba 40% liu, no Autoridade RAEOA simu rekomendasaun atu tau atensaun ekonomia mikro direita povu nia moris.
“Ami konsiente katak tenke utiliza orsamentu ba prioridae sira-ne’ebé efetivu. Ami mós sei hato’o nesesidade balun atu halo reajustamentu atu foku ba prioridade ne’ebé direita ba povu, tanba área ekonómia la’ós buat ki’ik, maibé ekonómia ba infraestrutura, turízmu, no seluktan maibé nia baze ba buat rua; aselera infraestrutura no integra povu ba prosesu dezenvolvimentu hodi sai benefisiáriu prinsipál direita,” nia hateten.
Notísia relevante:OJE 2027, RAEOA propoin millaun $50 prioriza setór ‘xave estratéjiku’ sira
Jornalista: Abílio Elo Nini
Editór: Rafael Ximenes de A. Belo
