APC preparadu hasoru fenómenu El Niño iha Vikeke
VIKEKE, 09 Outubru 2026 (TATOLI)–Komandante Operasionál Autoridade Protesaun Sivíl (APC) Munisípiu Vikeke, Cirílio Soares Gomes, hateten katak APC prepara ona medida sira atu hasoru fenómenu El Niño, ne’ebé bele hamosu bailoron naruk no afeta komunidade iha Munisípiu Vikeke.
“Kona-ba preparasaun atu hasoru El Niño, ami prepara an ona. Karik fenómenu ne’e akontese no hamosu bailoron naruk ne’ebé afeta komunidade iha Munisípiu Vikeke, ami iha ona dokumentu alerta sedu. Iha tempu badak oinmai, ami sei halo sosializasaun ba komunidade atu prepara an hasoru El Niño,” Cirilio Soares Gomes hateten ba TATOLI iha Postu Administrativu Vikeke Vila, Sesta ne’e.
Nia esplika katak APC hahú ona fahe dokumentu alerta kona-ba fenómenu El Niño ba parte relevante sira iha munisípiu ne’e. APC mós entrega dokumentu referidu ba rádiu komunitáriu sira atu fó informasaun ba públiku.
“Atu komunidade sira bele prepara an sedu hasoru fenómenu El Niño, hahú semana oin ami sei servisu hamutuk ho autoridade munisipál no parte relevante sira atu halo sosializasaun ba komunidade iha Postu Administrativu Vikeke Vila. Hafoin, ami sei kontinua atividade ne’e ba postu administrativu sira seluk,” nia akresenta.
Aleinde ne’e, nia husu komunidade atu kuidadu durante tempu bailoron, liuliu atu evita sunu rai arbiru, tanba ahi bele hada’et ba uma no propriedade sira seluk.
“Karik akontese katak bee maran iha suku balun, autoridade suku sira tenke informa ba ami, nune’e ami bele buka dalan atu fó apoiu ba komunidade hodi asegura nesesidade bee ba konsome,” nia hato’o.
Tuir informasaun kona-ba previzaun tempu nian hosi Diresaun Nasionál Meteorolojia no Jeofízika (DNMG), fenómenu El Niño bele sai forte entre fulan-Outubru no Dezembru 2026, no iha posibilidade atu kontinua to’o fulan Abril 2027.
APC informa ba públiku katak fenómenu El Niño, ne’ebé bele hamosu bailoron naruk, bele kauza udan menus ka udan monu tarde, temperatura aumenta, no risku inséndiu sai aas. Kondisaun hirak-ne’e bele mós afeta disponibilidade bee-moos, hamenus produsaun agríkola, hamenus ai-han ba animál, no aumenta risku moras relasiona ho tempu manas, inklui desidratasaun. Efeitu sira-ne’e bele aumenta risku malnutrisaun no hamosu impaktu seluk ba moris komunidade nian.
Atu hamenus impaktu hosi fenómenu El Niño, APC husu komunidade atu rai no uza bee ho kuidadu, evita desperdísiu bee, no jere rezerva bee no ai-han ho di’ak durante tempu bailoron naruk.
Komunidade mós presiza proteje saúde, hemu bee natoon atu prevene desidratasaun, no buka fatin mahon ka malirin atu evita manas liu. Aleinde ne’e, agrikultór sira no haki’ak animál tenke uza bee ho kuidadu no prepara rezerva bee no ai-han natoon ba família no animál sira.
APC mós alerta komunidade atu evita sunu rai arbiru no la soe sigaru rohan iha fatin ne’ebé fásil atu ahi kaer, tanba bele hamosu inséndiu no ahi bele hada’et lalais ba área sira seluk.
Iha kazu emerjénsia, komunidade bele kontatu Autoridade Protesaun Sivíl atu hetan asisténsia.
Jornalista: Vitorino Lopes da Costa
Editór: Xisto Freitas da Piedade
