UPJTL iha Pássabe, komunidade sira husu reabilita estrada kompleta ho bee-dalan
OEKUSI, 08 Outubru 2026 (TATOLI) – Uniaun Profisaun Jornalista Timor-Leste (UPJTL), hala’o atividade Mídia Tour hodi sensibiliza importánsia Literásia Mídia sosiál iha Eskola Tékniku Vokasionál (ETV) São João Paulo II, no komunidade sira iha suku Abani sub-rejiaun Pássabe Rejiaun Administrativa Espesiál Oekusi Ambeno (RAEOA).
Durante diálogu atividade Mídia Tour ne’e, Padre Paróku Pássabe, Agostu Hermenegildo Nunes hamutuk ho Xefe Suku Abani Carlos Elo, rekomenda ba Governu liliu Autoridade RAEOA, kona-ba projetu emerjénsia reabilitasaun estrada rurál kilometru 19,7 hahú husi sub-rejiaun Oésilo to’o sub-rejiaun pássabe tenkie kompleta ho drainajén no bee-dalan, nune’e lebele hetan estragu iha tempu udan.
“Komesa tinan kotuk husi kompañia EDS Unipesoál Lda ateru husi Oésilo mai to’o fronteira Pássabe, ida-ne’e ami sente ona no kontente maibé foin daudaun udan halo aat fila-fali tanba baleta laiha, tanba ne’e espera katak bele kontinua halo ho bee nia dalan, nune’e Governu gasta oan osan ba estrada ne’e labele saugate de’it, kona-ba atu hare ho simenti ka alkatraun, ne’e depende polítika Governu maaibé importante bee-dalan tenki tau prioridade,” Padre Paróku Pássabe, Agostu Hermenegildo Nunes, rekomenda.
Notísia relevante:Obra Públika suspende pagamentu ba Empreza implementadora projetu reabilitasaun estrada Oésilo
Iha fatin hanesan, Xefe Suku Abani, Carlos Elo, agradese tanba iha mandatu Autoridade anteriór hadi’a hotu estrada sira husi suku ba suku maske aterru de’it, maibé seidauk asegura ho di’ak, tanba seidauk kompleta ho bee-dalan.
Tuir nia, sei ita husik leet de’it hanesan ne’e, udan mai sei estraga hotu fali depois sei presiza osan boot tan atu bele aterru tan, tanba laiha bee-dalan. Tanba ne’e, autoridade komunitária ne’e rekomenda tenke iha kontinuasaun bainhira ateru kontinua tau baleta, nune’e bee halai tuir nia dalan.
“Ami konsiente Oekusi iha mudansa ba dezenvolvimentu liliu estrada, maibé tenki iha kontinuasaun, selae tinan ida Governu tau osan aterru estrada udan mai estraga tiha, depois tinan tuirmai komunidade hakilar tan ba estrada, ne’ebé gasta osan Estadu de’it, di’akliu halo pakote ida de’it, ateru ho kedas baleta,” nia hateten.
Notísia relevante:Empreza konstrutora hahú hikas projetu reabilitasaun estrada iha Oésilo ba Pássabe
Hatan ba rekomendasaun sira-ne’e, Diretór Diresaun Servisu Rejionál Obra Públika, Remígio Nuno Sila rekoñese katak reabilitasaun estrada rurál husi sub-rejiaun Oésilo liga ba sub-rejiaun Pássabe seidauk konstrui baleta tanba empreza sei finaliza.
“Projetu ne’e empreza rua mak ezekuta maibé uza kompañia ida nia ekipamentu, ne’ebé ita rekomenda ona atu aselera finalizasaun antes tempu udan, tanba projetu ne’e ho kategória emerjénsia ne’ebé implementa dezde 2024 halo ho pakotementu, hamoos dalan, taka ku’ak ho aterru estrada no kee drainajén ka bee-dalan, agora kompañia sei kontinua servisu hela ba prosesu konkluzaun ka finalizasaun,” nia hateten
Notísia relevante:Tinan ne’e RAEOA laiha projetu foun, kontinua de’it projetu anteriór no selu dívida
Entretantu, Projetu reabilitasaun estrada rurál ne’e kategória projetu emerjénsia neʼebé aprova husi Konsellu Administrasaun Fundu Infraestrutura (KAFI) rejionál daruak.
Projetu emerjénsia ne’e, ezekuta husi kompañia Timor-Lorosa’e Unipesoál Lda implementa ho valór kontratu $331,877.59, neʼebé aloka husi fundu infraestrutura nasionál, ho durasaun serbisu fulan-neen ho distánsia kilometru 19,7 hahú husi mota Noél-Ekat, suku Bobometo sub-rejiaun Oésilo to’o suku Abani sub-rejiaun Pássabe, maibé nia pagamentu hela rihun $76-resin
Jornalista: Abílio Elo Nini
Editór: Rafael Ximenes de A. Belo
