OEKUSI, 07 Janeiru 2026 (TATOLI) – Diretór Diresaun Rejionál Infraestrutura (DRI) Rejiaun Administrativa Espesiál Oekusi Ambeno (RAEOA), Remigío Nuno Sila, kuarta-feira ne’e, fó sai katak, Planu Asaun Anuál (PAA) 2026, iha Oekusi sei laiha infraestrutura foun ka projetu foun maibé sei kontinua de’it projetu anteriór sira hamutuk 53 inklui selu dívida sira hamutuk millaun $22 ne’ebé aloka ona iha Orsamentu Jerál Estadu (OJE) 2026.
“Iha aprovasaun Orsamentu Jerál Estadu (OJE) 2026 ba projetu foun atu implementa iha Oekusi laiha, entaun iha tinan ne’e ita labele iha projetu foun tanba refleta ba orsamentu, só iha de’it projetu sira-ne’ebé ezekuta ona iha tinan kotuk entaun tinan ne’e kontinua de’it,” nia hateten ba jornalista sira iha Oekusi, ohin.
Notísia relevante:KAFI Oekusi aprova projetu emerjénsia 26 ho kustu millaun $36-resin
Remígio Sila, esplika katak, iha OJE 2026 aloka ba iha kapitál dezenvolvimentu iha de’it millaun $22, hosi verba ne’e, fahe ba kategória tolu, primeiru selu dívida ba projetu anteriór sira-ne’ebé on going (la’o hela) ona no balun finaliza ona, entaun tenke selu iha OJE 2026 ne’e, ho nia valór orsamentu rihun $951,000.00.
Daruak, sei selu projetu 53 komposta hosi projetu iha 2025 hamutuk 29 inklui grande projetu rua hanesan projetu estrada nasionál husi Tono ba Oésilo no husi Noefefan ba Oénunu mak tenke kontinua iha 2026, tanba nia orsamentu prevee kedas iha OJE 2026 hamutuk millaun $15.
Notísia relevante:PA RAEOA sei re-karateriza projetu suspendidu 154 bazeia orsamentu ba programa
“Ita sei halo pagamentu ba sira, bazeia ezekusaun obra ho nia progresu serbisu tanba ne’e direitu empreza sira atu husu pagamentu, kuandu empreza ezersíe ona nia devér tenki rekoñese mós nia direitu,” nia afirma.
Datoluk, hosi projetu 53 ne’e, iha projetu emerjénsia 24, tanba tinan kotuk implementa projetu hirak-ne’e laiha fundu, maibé tanba ho esforsa autoridade RAEOA ho Ajénsia Dezenvolvimentu Nasionál Institutu Públiku (AND,I.P), konsege integra nia proposta ba projetu emerjénsia hirak-ne’e ba iha planu OJE 2026.
“Ne’ebé ba projetu 24 ne’e, nia orsamentu alokadu ona, signifika tinan ne’e tenke halo ona pagamentu, sei bainhira tékniku husi DRI no ADN halo ona fiskalizasaun ba ezekusaun projetu ho progresu serbisu hatudu rezultadu, entaun empreza iha direitu hetan pagamentu, ezemplu konstrusaun kazerna PNTL Pássabe, estrada sira, sede suku inklui ponte ki’ik balun,” nia hateten.
Entretantu, dotasaun Orsamentu Jerál Estadu (OJE) ba Autoridade RAEOA iha tinan-2026 hamutuk 22,788,994,00. Husi montante ne’e, alokasaun ba kategória Kapitál dezenvolvimentu hamutuk 951,391,00 (4%).
Notísia relevante:RAEOA prevee millaun $60 ba saúde, edukasaun, infraestrutura-diversifika ekonomia
Jornalista: Abílio Elo Nini
Editór: Rafael Ximenes de A. Belo
