Obra Públika suspende pagamentu ba Empreza implementadora projetu reabilitasaun estrada Oésilo

OEKUSI, 31 Jullu 2026 (TATOLI) –  Diresaun Rejionál Serbisu Obra Públika iha Rejiaun Administrativa Espesiál Oekusi Ambenu (RAEOA), suspende provizória pagamentu ba empreza nasionál rua tanba ezekuta projetu reabilitasaun estrada rurál iha suku Usitasa’e liga suku Bobometo, no husi Bobometo sub-rejiaun Oésilo liga ba sub-rejiaun Pássabe laiha inspesaun finál no la kumpre dezeñu BoQ.

“Projetu rua ne’e implementa husi kompañia nasionál, Timor-Lorosa’e Unipesoál Lda, nia trosu husi Oésilo to’o fronteira Haumeni-Ana sub-rejiaun Pássabe ho distánsia kilometru  19 ho nia progresu serbisu daudaun ne’e to’o 90% maibé tanba laiha inspesaun finál entaun ne’e kategória empreza tenke responsabiliza tenki mellora fila-fali halo reparasaun ba fatin sira-ne’ebé ku’ak, rai-halai, entaun kompañia sira tenke hadi’a fila-fali hafoin hetan sira-nia dieitu pagamentu husi Governu,” Diretór Rejionál Serbisu Obra Públika Oekusi, Remígio Nuno Sila informa, iha Oekusi, ohin.

Notísia relevante:PA RAEOA nota reabilitasaun estrada rurál iha Oésilo-Pássabe laiha kualidade  

Kompañia daruak husi Ami-Bele Unipesoál Lda, nia ezekuta reabilitasaun estrada husi bairru Hau-Ana ba to’o aldeia Tumin suku Bobometo, nia progresu mós atinje ona 90%, maibé iha reklamasaun husi komunidade sira katak, kondisaun projetu laiha kualidade, entaun tenke hadi’a fila-fali.

“Ita-nia rekomendasaun hato’o ona ba kompañia depoisde kompañia husu karta inspesaun, entaun tékniku sira husi Obra Públika hamutuk kompañia, kria ekipa konjunta ida tun iha térrenu halo inspesaun no produs rekomendasaun barak, primeiru tenki haree kapa ateru ne’e tenki bazeia dezeñu BoQ, largura estrada no eskavasaun entaun kompañia tenke hadi’a fali hafoin halo termu entrega ba Autoridade liuhusi Obra Públika hanesan supervizaun maka foin hetan nia direitu pagamentu,” nia afirma.

Notísia relevante:PDHJ Oekusi deskobre empreza konstrutora rua abandona projetu estrada no bee-moos iha Pássabe

Diretór Obra Públika ne’e, esplika katak, kompañia rua ne’e, sira-nia pagamentu seidauk bele prosesa maske alokadu ona iha OJE 2026 ne’e, hanesan kompañia Timor-Lorosa’e sira-nia osan aloka kedas iha tinan ne’e rihun $76-resin, no kompañia Ami-bele Unipesoál Lda, nia alokasaun iha OJE 2026 ne’e hamutuk rihun $32-resin.

“Osan ne’e, sira-nia direitu duni atu hetan, maibé tenke hadi’a fali bazeia rekomendasaun husi Obra públika nian, bainhira hadi’a hotu, ita sei halo inspesaun finál kuandu kumpre ona, maka foin bele halao pagamentu,” nia hateten.

Jornalista sira tenta konfirma asuntu ne’e ho Diretór kompañia Timor-Lorosa’e Unipesoál Lda, Toni Lopes, maibé rejeita atu fó informasaun tanba okupadu ho serbisu seluk.

“Ha’u labele ko’alia ida-ne’e, ohin mai konsulta ba pagamentu de’it, atu ko’alia kona-ba projetu, depois maka ha’u-nia tékniku sira ko’alia,” nia hateten ba jornalista sira iha edifísiu Obra Públika Oekusi nia oin, hafoin remata enkontru ho ho Diretór Obra Públika.

Notísia relevante:KAFI Oekusi aprova projetu emerjénsia 26 ho kustu millaun $36-resin

Entretantu, Projetu reabilitasaun estrada rurál ne’e hanesan projetu emerjénsia neʼebé aprova husi Konsellu Administrasaun Fundu Infraestrutura (KAFI) rejionál daruak, neʼebé kompañia Timor-Lorosa’e Unipesoál Lda implementa ho valór kontratu $331,877.59, ne’ebé aloka husi fundu infraestrutura nasionál durasaun serbisu fulan-neen ho distánsia kilometru 19,7 hahú husi mota Noél-Ekat, suku Bobometo sub-rejiaun Oésilo to’o suku Abani sub-rejiaun Pássabe, maibé nia pagamentu hela rihun $76-resin.

Hanesan mós kompañia Ami-Bele ezekuta reabilitasaun estrada husi bairru Hau-Ana suku Usitasa’e to’o aldeia Tumin suku Usitasa’e sub-rejiaun Oésilo ezekuta ho valór rihun $200-resin no dadaun ne’e, kompañia seidauk hetan direitu pagamentu $32-resin.

Jornalista: Abílio Elo Nini

Editór: Rafael Ximenes de A. Belo