OEKUSI, 08 Abríl 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, nota projetu emerjensia ba reabilitasaun estrada rurál kilometru 19 husi mota Noel-Ekat, suku Bobometo sub-rejiaun Oésilo liga bá suku Abani, sub-rejiaun Pássabe laiha kualidade.
Notísia relevante:KAFI Oekusi aprova projetu emerjénsia 26 ho kustu millaun $36-resin
Ho situasaun ne’e, Prezidente Autoridade RAEOA, Rogério Tiago Lobato, orienta Diresaun Rejionál Infraestrutura (DRI) atu fó xamada atensaun ba empreza responsavel konstrutora Timor-Lorosa’e Unipesoál Lda atu kumpre dezeñu BoQ ho termu kontratu.
“Ha’u ko’alia ona ho DRI atu ko’alia ho empreza na’in atu-bele halo aterru mahar uitoan depois sama halo metin tanba ita foin sa’e husi mota Noel-Ekat, balun kaber balun sei ku’ak hela no estrada ladun luan, maibé husi kompañia nia razaun tanba aterru iha foho lolon taka ku’ak, hafoin udan bo’ot, entaun ita fó tan tempu ba sira atu organiza halo didi’ak importante mak ne’e sira tenke halo estrada ne’e di’akliu hanesan aterru iha mota Noel-Ekat, tan ne’e mak ha’u mai halo fiskalizasaun atu haree duni kualidade, buat ne’ebé ladi’ak tenke kurije no fó rekomendasaun ba kompaña atu halo tuir kontratu ne’ebé sira asina ona,” nia rekomenda, bainhira hala’o fiskalizasaun iha Oésilo.
Empreza promete kumpre orientasaun
Hataan ba rekomendasaun ne’e, Enjeñeiru Empreza Timor-Lorosa’e, Osório Colo, rekoñese tanba estrada seidauk finaliza, nune’e nia promete kumpre atu hadi’a tuir rekomendasaun Autoridae RAEOA nian.
“Ami halo tuir estandar ne’ebé fó ona atu alarga tan tanba tuir BoQ mak iha metru hitu inklui kedas bee dalan tanba agora foin metru lima no sei aumenta tan aterru, tanba antes ne’e komunidade mak husu atu taka ku’ak hodi fasilita asesu ho di’ak, ne’ebé ami promete ami halo luan no kaber tuir saida mak Prezidente Autoridade rekomenda,” nia katak.
Projetu reabilitasaun estrada rurál ne’e hanesan projetu emerjénsia ne’ebé aprova husi Konsellu Administrasaun Fundu Infraestrutura (KAFI) rejionál daruak, ne’ebé empreza Timor-Lorosa’e Unipesoál Lda implementa ho valór kontratu $331,877.59, ne’ebé aloka husi fundu infraestrutura nasionál durasaun servisu fulan-neen ho distánsia kilometru 19 hahú husi mota Noel-Ekat, suku Bobometo sub-rejiaun Oésilo to’o suku Abani sub-rejiaun Pássabe.
Notísia relevante:Rogério Lobato halo diálogu ho komunidade iha Pássabe
Jornalista: Abílio Elo Nini
Editór: Florencio Miranda Ximenes
