PDHJ Oekusi deskobre empreza konstrutora rua abandona projetu estrada no bee-moos iha Pássabe
OEKUSI, 11 Dezembru 2025 (TATOLI) – Provedória Direitu Umanu no Justisa (PDHJ) Delegasaun Territóriál Rejiaun Administrativa Espesiál Oekusi Ambeno (RAEOA), deskobre empreza rua kontinua abandona projetu reabilitasaun estrada rurál ida no projetu sistema kanalizasaun bee-moos iha suku Malelat sub-rejiaun Pássabe.
Notísia relevante:Kompañia Asistono ho CP kontinua reabilita estrada rurál iha Pássabe
Diretór PDHJ Delegasaun Territoriál Oekusi, Bartolomeu Gonçalves, informa, projetu rua ne’ebé ekipa PDHJ deteta hafoin halo manotorizaun ba sub-rejiaun sira, ne’ebé deteta projetu ne’e ezekuta kedas iha 2022 maibé to’o ohin loron seidauk finaliza.
Tanba ne’e, nia rekomenda ba Autoridade RAEOA liu-liu Diresaun Rejionál Infraestrutura (DRI) atu kontinua koordena ho empreza konstrutóra sira, atu kontinua finaliza obra sira.
“Ita husu nafatin ba DRI hanesan téknika, atu bolu kompañia CP unipesoál Lda, atu responsabilidade ba projetu reabilitasaun estrada rurál husi bairru Kusi suku Ban-Afi sub-rejiaun Nítibe liga ba suku Malelat sub-rejiaun Pássabe, tanba obra ne’e nia durasaun serbisu fulan neen maibé to’o agora sei kontinua abandona, tanba orsamentu ba projetu ne’e $784,814.50, ezekuta kedas iha 2022,” nia dehan iha Oekusi, ohin.
Nune’e mós kompañia Huno Bahalako Unipesoál Lda, abandona projetu kanalizasaun bee-moos iha suku Malelat sub-rejiaun Pássabe ne’ebé abandona dezde 2022 to’o agora seidauk finaliza.
“Ida-ne’e mak rezultadu monitorizasaun ba projetu sira iha suku no aldeia, husi kompañia implementadór sira abandona, ami sempre koordena ho autoridade kompetente sira, Diresaun Obra Públika, ho diresaun ida-ne’e mak na’in ba projetu, ami sempre enkoraja sira, oinsá bele halo akompañamentu hodi kumpre ba kontratu, nune’e bele finaliza obra sira, hodi bele benefísia komunidade sira, atu asesu ba estrada no fasilidade públika seluk tan,” nia dehan.
Notísia relevante:PA RAEOA xamada kompañia rua loron 60 tenke finaliza estrada rurál Pássabe
Hatan ba rekomendasaun ne’e, Diretór Diresaun Rejionál Infraestrutura, Remígio Nuno Sila, rekoñese projetu barak mak paradu no balun sei iha kontinuasaun. Ezemplu projetu konstrusaun bee-moos iha suku Malelat ezekuta husi kompañia Hunobahalako, projetu ne’e implementa iha 2022 maibé to’o agora seidauk entrega ba komunidade sira atu utiliza.
“Maibé ita mós iha ekipa konjunta, komposta husi departamentu SAS, EDTL ho diresaun, ita hamutuk vizita ona fatin ne’e, ita deskobre liña elétrika sei iha problema tanba asesores balun kompañia fornese ona hanesan bomba, hela de’it ahi mak seidauk instala, entaun solusaun mak ne’e, daudaun ne’e husi diresaun hato’o ona pedidu adisionál ba iha aprovizionamentu atu kompañia bele kontinua ho instalasaun liña elétrika husi bairru Kusi ba Malelat,” nia hateten.
Kona-ba kompañia CP Unipesoál Lda nia konstrusaun paradu, to’o agora kompañia laiha konfirmasaun, tan ne’e husi parte DRI mós submete ona karta xamada atensaun ba kompañia atu bele kontinua obra referida, no hatama ona karta ba parte legál sira, oinsá atu haree asuntu ne’e, hodi bele deside hapara kontratu tanba tuir planu autoridade sei kontinua fali kontrusaun estrada rurál ne’e, komesa husi Mahata suku Lela-Ufe liuhusi Kusi to’o suku Malelat.
“Ho problema sira-ne’e, ita labele halo pagamentu ba sira, tanba kondisaun serbisu paradu no laiha kontinuasaun, karik husi kompañia hakarak kontinua obra ne’e, tenke konfirma mai obra públika, no kontinua serbisu, nune’e bele hetan nia direitu, importante ezerse uluk nia devér,” nia hateten.
Notísia relevante:PA RAEOA nota reabilitasaun estrada rurál iha Oésilo-Pássabe laiha kualidade
Entretantu, Jornalista Ajénsia Tatoli,I.P, esforsa atu konfirma asuntu ne’e ho parte kompañia sira, maibé laiha paradeiru.
Jornalista: Abílio Elo Nini
Editór: Rafael Ximenes de A. Belo
