Empreza konstrutora hahú hikas projetu reabilitasaun estrada iha Oésilo ba Pássabe

OEKUSI, 14 Setembru  2026 (TATOLI) –  Kompañia Nasionál Timor-Lorosa’e Unipesoál Lda, daudaun ne’e kontinua hikas halo melloria ba projetu reabilitasaun estrada rurál ho distánsia kilometru 19, husi suku Bobometo sub-rejiaun Oésilo liga ba suku Abani sub-rejiaun Pássabe, hafoin hetan suspensaun ba prosesu pagamentu husi Autoridade Rejiaun Administrativa Espesiál Oekusi Ambeno (RAEOA).

Notísia relevante:Obra Públika suspende pagamentu ba Empreza implementadora projetu reabilitasaun estrada Oésilo

Diretór Servisu Rejionál Obra Públika, Remígio Nuno Sila, informa, aleinde trosu Oésilo ba Pássabe sei inklui trosu husi Hau-Ana suku Usitasa’e ba Tumin suku Bobometo sub-rejiaun, ne’ebé ezekuta husi kompañia Ami-Bele, iha devér atu kontinua hadi’a fali nune’e bele hetan direitu ba pagamentu.

“Kompañia rua ne’e, iha devér atu halo fali servisu, tanba antes ne’e simu ona rekomendasaun hafoin halo inspesaun direita iha terrenu tanba item balun husik hela projetu ne’e, entaun tenke kontinua mellora fila-fali mak foin hetan sira-nia direitu ba pagamentu, tanba nia orsamentu aloka kedas iha 2026 ne’e,” nia hateten ba jornalista sira iha Oekusi, ohin.

Osan povu nian tenke jere ho di’ak

Nia hateten, Diresaun Servisu Rejionál Obra Públika hamutuk ho Diresaun Fundu Espesiál Dezenvolvimentu (FED), la autoriza atu halo aprova pedidu pagamentu enkuantu kondisaun obra iha iha terrenu seidauk kumpre padraun estrada ninian.

“Tanba iha tempu udan foin daudaun estraga balun hetan estragu, entaun kompañia iha devér tomak atu hadi’a fali, depois molok atu hetan pagamentu sei hetan tan inspesaun husi ADN no tékniku sira husi Obra Públika, tanba osan povu nian tenke jere ho di’ak,” nia hateten.

Notísia relevante:PA RAEOA nota reabilitasaun estrada rurál iha Oésilo-Pássabe laiha kualidade  

Nia hateten, antes ne’e, Diresaun Rejionál Serbisu Obra Públika iha Rejiaun Administrativa Espesiál Oekusi Ambenu (RAEOA), suspende provizória pagamentu ba Empreza nasionál rua , Timor-Lorosa’e Unipesoál Lda ho kompañia Ami Bele Unipesoál Lda, tanba ezekuta projetu reabilitasaun estrada rurál iha suku Usitasa’e liga suku Bobometo, no husi Bobometo sub-rejiaun Oésilo liga ba sub-rejiaun Pássabe laiha inspesaun finál no la kumpre dezeñu BoQ.

“Progresu serbisu dadaun ne’e to’o 90% maibé tanba laiha inspesaun finál entaun ne’e kategória empreza tenke responsabiliza tenke mellora fila-fali halo reparasaun ba fatin sira-ne’ebé kuak, rai halai, entaun kompañia sira tenke hadi’a fila-fali hafoin hetan sira-nia dieitu pagamentu husi Governu,” nia informa.

Kompañia daruak husi Ami-Bele Unipesoál Lda, nia ezekuta reabilitasaun estrada husi bairru Hau-Ana ba to’o aldeia Tumin suku Bobometo, nia progresu mós atinje ona 90%, maibé iha reklamasaun husi komunidade sira katak, kondisaun projetu laiha kualidade, entaun tenke hadia’ fila-fali.

“Ita-nia rekomendasaun hato’o ona ba kompañia depoisde kompañia husu karta inspesaun, entaun tékniku sira husi Obra Públika hamutuk kompañia, kria ekipa konjunta ida tun iha térrenu halo inspesaun no produs rekomendasaun barak, primeiru tenke haree kapa ateru ne’e tenke bazeia dezeñu BoQ, largura estrada no eskavasaun entaun kompañia tenke hadi’a fali hafoin halo termu entrega ba Autoridade liuhusi Obra Públika hanesan supervizaun maka foin hetan nia direitu pagamentu,” nia afirma.

Entretantu, Projetu reabilitasaun estrada rurál ne’e hanesan projetu emerjénsia neʼebé aprova husi Konsellu Administrasaun Fundu Infraestrutura (KAFI) rejionál daruak, neʼebé kompañia Timor-Lorosa’e Unipesoál Lda implementa ho valór kontratu $331,877.59, ne’ebé aloka husi fundu infraestrutura nasionál, ho durasaun serbisu fulan-neen ho distánsia kilometru 19,7 hahú husi mota Noél-Ekat, suku Bobometo sub-rejiaun Oésilo to’o suku Abani sub-rejiaun Pássabe, maibé nia pagamentu hela rihun $76-resin.

Hanesan mós kompañia Ami-Bele ezekuta reabilitasaun estrada husi bairru Hau-Ana suku Usitasa’e to’o aldeia Tumin suku Usitasa’e sub-rejiaun Oésilo ezekuta ho valór rihun $200-resin no dadaun ne’e, kompañia seidauk hetan direitu pagamentu $32-resin.

Jornalista: Abílio Elo Nini

Editór: Rafael Ximenes de A. Belo