UPJTL husu Prezidente Autoridade RAEOA utiliza jornalista sira ba atividade RAEOA

OEKUSI, 07 Outubru 2026 (TATOLI)—Uniaun Profisaun  Jornalista  Timor-Leste  (UPJTL) husu ba Prezidente Autoridade Rejiaun Administrativa Espesiál Oekusi Ambenu (RAEOA), Régio da Cruz Salu, atu utiliza mídia ba atividade RAEOA nian.

“Nu’udár asosiasaun, UPJTL fó-hanoin ba Prezidente RAEOA utiliza jornalista sira ba ita-boot nia atividade. Buat ruma ne’ebé mak ita-boot sente la satisfáz iha jornalista sira-nia publikasaun ka ladún balansu mak ita-boot husu direitu resposta. Lei Komunikasaun sosiál fó dalan ba ida- ne’e,” Prezidente UPJTL, Horácio Babo dehan iha ámbitu sorumutu entre jornalista sira ho Prezidente RAEOA, iha Gabinete Prezidente Autoridade RAEOA, Oekusi, Kuarta ne’e.

Nia  husu mídia nafatin halo kobertura ba atividade  Prezidente Autoridade RAEOA nian  tanba mídia mak ajuda servisu PA nia servisu sira.

Uniaun Profisaun Jornalista Timor-Leste  hasoru-malu ho Prezidente Autoridade Rejiaun Administrativa Espesiál Oekusi Ambenu hodi relata kona ba jornalista na’in-sanulu (10) ne’ebé partisipa iha Media Tour iha RAEOA durante loron haat, relasiona ho komemorasaun Loron Liberdade Imprensa ne’ebé monu iha loron 16 fulan-Outubru.

Notísia relevante: UPJTL kontinua sosializa importánsia jornalizmu ba estudante sira iha Eskola Bázika Terseiru Siklu Pásabe

“Ami hala’o kooperasaun ho Sekretaria Estadu Komunikasaun Sosiál (SEKOMS) hodi realiza  atividade ida naran Media Tour. Media Tour ida-ne’e foka ba fronteira, tanba ida ne’e mak grupu ida ba Kovalima, grupu ida ba Maliana no grupu seluk mai iha RAOEA. Iha RAEOA, ami lori mídia hamutuk na’in-sanulu kompostu husi mídia  RTTL, TATOLI, TIMOR POST, SMNEWS, RTK, SAP-NEWS TL no STL. Ami-nia objetivu husi viajen ne’e hakarak halo sosializasaun literasia mídia ba foin-sa’e no komunidade,” Horácio subliña.

Aleinde ne’e, UPJTL halo kobertura ba atividade sosiál sira iha área rurál no fó-sai progresu dezenvolvimentu iha RAEOA.

“Horisehik ami mai to’o iha fronteira ami hasoru kedas komadante PNTL bainhira nia halo inspensaun ba inséndu ki’ik ida akontese iha-ne’ebá, entaun ami halo kobertura uitoan ba situasaun siguransa nia kondisaun balun ne’ebé ita-nia UPF sira enfrenta iha fronteira. Ami mai marka kumprimenta de’it Prezidente Autoridade atu informa de’it ba ita-boot katak ami iha atividade iha Oekusi. Horisehik kedas ami bá Oesilo ami hasoru Xefe Suku Bobometu no Xefe Suku Abani iha Pásabe. Ita-nia progresu ne’ebé lais lahalimar iha parte ne’ebá eintermu estrada, eletrisidade, bee no saneamentu. Ami mós bá fatin lokál sira, depoiz ami hasoru estudante balun ne’ebé publika jornál parede iha eskola téknika vokasionál nian,” nia haktuir.

Nia afirma UPJTL selebra Loron Liberdade Imprensa ne’e la’ós semináriu maibé hakarak lori jornalista sira husi Dili bá área rurál sira iha RAEOA atu sente situasaun no realidade iha-ne’ebá.

“Ami mós halo sosializasaun bá eskola rua ka tolu, disemina ba estudante sira oinsá mak  utiliza  mídia sosiál ho responsabilidade  no liliu alin feto sira banhira utiliza mídia sosiál. Espera katak publikasaun husi jornalista sira-nian habelar informasaun sira-ne’e ba públiku ho di’ak,” nia hateten.

Iha fatin hanesan, Prezidente Autoridade Rejiaun Administrativu Espesiál Oekusi Ambenu (RAEOA), Régio da Cruz Salu, agradese ba ekipa UPJTL ne’ebé mak mai hasoru direta ne’ebé husu atu fó oportunidade ba mídia atu nafatin fó informasaun dezenvolvimentu RAEOA nian ba públiku.

“Husi parte ami-nian hakarak husu ba mídia halo nafatin publikasaun ba RAEOA, tanba la’ós kestaun kona-ba saida mak ita halo ona, saida mak ita seidauk. Se ita halo ona karik objetivu ka misaun morál boot ne’e saida. Tanba Oekusi rai enklave iha nasaun ida-nia leet, se nasaun ida haree ita mudansa di’ak sira tenke di’ak liu ita. Tanba ne’e, agora se ita-nia dezenvolvimentu ladún la’o  ka ladún di’ak ita nafatim Estadu no povu TL, entaun ami so husu katak nafatin publika Oekusi nia  lala’ok dezenvolvimentu  saida de’it,” Prezidente Autoridade dehan.

Régio afirma katak mídia importante ba sira tanba ajuda sira-nia servisu sira hodi hato’o bá Governu sentrál, tanba ne’e agradese ba ekipa UPJTL ne’ebé mai fronteira  hodi publika dezenvolvimentu Oekusi liliu iha parte fronteira sira tanba fronteira  ne’e to’o ohin loron bele dehan  katak seidauk fronteira ekonomia lolos, so bele dehan fronteira imigrasaun, entaun bá-oin tenke halo fronteira ekonomia tanba bainhira la halo fronteira ekonomia mak hamosu nafatin dalan illegál.

Jornalista: Felicidade Ximenes

Editór: Xisto Freitas da Piedade