UPJTL kontinua sosializa importánsia jornalizmu ba estudante sira iha Eskola Bázika Terseiru Siklu Pásabe
OEKUSI, 06 Outubru 2026 (TATOLI)–Iha loron daruak ne’e, Uniaun Profisaun Jornalista Timor Leste (UPJTL) kontinua sosializa importánsia jornalizmu ba estudante sira husi Eskola Bázika Terseiru Siklu Pásabe iha Sub-rejiaun Pásabe, Rejiaun Administrativa Espesiál Oekusi Ambeno, liuhusi Media Tour, hodi komemora Loron Nasionál Liberdade Imprensa.
”Ami mai iha RAEOA atu hakbesik bá komunidade, estudante no foin-sa’e sira hodi fahe informasaun kona-ba importánsia jornalizmu ba ita-boot sira iha-ne’e,” Prezidente UPJTL, Horácio Babo, dehan iha ámbitu sosializa importánsia jornalizmu ba estudante sira iha Ensinu Báziku Terseiru Siklu Pásabe, Tersa ne’e.
Notísia relevante: UPJTL halo Media Tour bá Bobometo, kobertura no literasia mídia sai alvu
Nia esplika jornalizmu ne’e knaar ida husi pesoál ida naran jornalista ne’ebé mak loron bá loron hasai foto, hakerek notísia no edita notísia hodi divulga ba públiku liuhusi mídia komunikasaun hanesan televizaun, jornál, rádiu no mídia dijitál sira.
“Jornalista nia servisu mak rekolla informasaun ne’ebé akontese, hakerek no halo edisaun tantu iha testu no vídeo hodi publika ba públiku,” Horácio esplika.
Nia hatutan tempu ida agora ne’e ema hotu asesu ba mídia dijitál liuhusi Facebook, WhatsApp, Instragram, Tiktok no seluk tan.
Babo esplika iha mídia ne’e mós banhira utiliza di’ak bele hetan osan tanba fasilita ema liuhusi atividade loroloron hanesan te’in, halo modo, depoiz publika mak ema seluk haree ne’e bele mai sosa.
Iha fatin hanesan, Diretór Eskola Bázika Terseiru Siklu Pásabe, Domingos Mauno, agradese ba ekipa mídia UPJTL ne’ebé mak mai to’o iha Pásabe hodi fahe informasaun kona-ba importánsia jornalizmu ba estudante sira.
“Matéria ne’ebé mak ohin ita-boot sira mai fahe ne’e di’ak tebes ba estudante sira oinsá sira bele utiliza mídia ho di’ak tuir nia dalan tanba iha mídia ne’e iha vantajen no dezvantajen ne’ebé mak iha-ne’ebá,” Domingos afirma.
Nune’e mós, estudante Verónica da Cunha, agradese ba mídia nasionál sira ne’ebé mak mai hato’o informasaun kona-ba importánsia husi jornalizmu ba estudante sira iha Pásabe.
“Ami kontente loos banhira mîdia sira mai ami-nia fatin sosializa importánsia jornalizmu no mós kona-ba oinsá utiliza mídia ho efisiénsia,” nia konklui.
Jornalista: Felicidade Ximenes
Editór: Xisto Freitas da Piedade
