Estudante rihun-tolu resin iha RAEOA sei hetan kartaun ezame
OEKUSI, 08 Outubru 2026 (TATOLI) – Estudante na’in-3.072 iha Rejiaun Administrativa Espesiál Oekusi Ambeno (RAEOA) nu’udar kandidatu ba hodi partisipa iha ezame nasionál tinan ne’e iha 19 to’o 23 Outubru.
Nune’e iha kuarta-feira, loron 07 Outubru ne’e, Diresaun Servisu Rejionál Edukasaun Oekusi konvida dirijente eskola sira, hodi distribui ona númeru estudante no kartaun ezame ba eskola sira, hahú husi Ensinu Bázika Sentrál (EBC,sigla portugés) hamutuk eskola 23, Ensinu Sekundáriu Jerál (ESG) ualu no no Ensinu Tékniku Vokasionál (ETV) haat.
Diresaun Servisu Rejionál Edukasaun Oekusi, Vincêncio Cono informa katak estudante ne’ebé sei partisipa iha ezame nasionál tinan ne’e, hamutuk na’in 3.072, komposta husi Ensinu Báziku Sentrál (EBC,sigla portugés) na’in-1.604 mai husi eskola 23, nune’e mós husi nível Ensinu Sekundáriu Jerál (ESG) no Eskola Tékniku Vokasionál (ETV) hamutuk 1.423, ne’ebé mai husi ESG ualu no ETV haat.
Ezekutivu ne’e hateten, distribuisaun númeru ezame nasionál ba dirijente estabelesimentu sira, bele hahú halo preparasaun iha kada eskola idak-idak.
“Kartaun ka númeru ezame ne’e, ita entrega liuhusi dirijente eskola sira iha nivél Ensinu Báziku 3º siklu, nivél Ensinu Sekundáriu Jerál (ESJ), no Ensinu Sekundáriu Tékniku-Vokasionál (ESTV),” Diretór Servisu Rejionál Edukasaun Oekusi, Vincêncio Cono, hateten iha salaun edukasaun Oekusi, kuarta ne’e.
“Ohin ita hahú ona prosesu administrativu ezame nian ho sedu hodi hases an husi obstákulu tékniku iha loron ezame nasionál nian,” nia afirma.
Dirijente Servisu Edukasaun ne’e, subliña katak objetivu husi distribuisaun sedu ne’e mak atu garante dadus ida-idak nian la’o loos no tuir tempu ne’ebé determina ona husi Ministériu Edukasaun.
Tanba ne’e, nia husu rigorozamente ba dirijente instalasaun eskolár sira no ekipa téknika sira atu verifika ho didi’ak identidade no dadus estudante ida-idak nian hodi hases erru ka fallansu administrativu antes loron ezame to’o.
Notísia relevante:ME disemina informasaun ba dirijente Oekusi prepara ezame nasionál 2026
Iha biban ne’e, dirijente eskola sira hatudu kompromisu boot hodi simu númeru ezame sira ne’e, no prontu atu kontinua fó orientasaun no motivasaun ba estudante sira iha sira-nia eskola respetiva.
Jornalista: Abílio Elo Nini
Editór: Rafael Ximenes de A. Belo
