PNTL garante seguransa misa fúnebre Papa Francisco iha Tasi Tolu
DILI, 24 Abríl 2025 (TATOLI)—Segundu Komandante Jerál Polísia Nasionál Timor-Leste (PNTL), Komisáriu Pedro Belo, hateten Komandu PNTL sei garante seguransa iha misa fúnebre Papa Francisco iha Tasi Tolu, Dili, sábadu (26/04).
“Ita hatene iha sábadu iha misa boot ida iha Tasi Tolu. Tanba ne’e, ita mós iha ona planu ba ida ne’e no ita mós orienta ona ita-nia komandante sira iha Dili para asegura,” Pedro Belo dehan hafoin abertura atividade sosializasaun Psikososiál Dezenvolvimentu Nasionál ba estudante Universidade da Paz (UNPAZ), Dili, kinta ne’e.
Nia dehan, PNTL mós sei asegura sarani sira-ne’ebé halo prosisaun husi Largo Lesidere to’o iha Tasi Tolu hodi partisipa misa solene referida.
Notísia relevante: Misa fúnebre Papa Francisco sei hala’o iha sábadu lorokraik iha Tasi-tolu
Komisáriu Pedro Belo husu ba sarani sira atu kontribui ba pás atu misa solene ba fúnebre nian ne’e bele la’o di’ak.
“Husu ba sarani hotu-hotu ne’ebé atu partisipa misa ida-ne’e la’o ba labele lori kro’at no labele lanu tanba ita iha seguransa atu orienta ita tuir dalan ne’ebé iha. No mós labele provoka malu hodi hamosu problema,” nia fó hanoin.
Rekorda fali katak tuir orariu ne’ebé fó-sai, misa fúnebre Sua Santidade Papa Francisco nian sei hala’o iha tuku 18:00 Otl.
Jornalista: Natalino Costa
Editór: Xisto Freitas da Piedade
