DILI, 25 Abríl 2025 (TATOLI) – Komisaun konjunta kompostu husi Arkidioseze no Governu liuhusi Ministériu Administrasaun Estatál (MAE) no Polísia Nasionál Timor-Leste (TL) atualiza informasaun kona-ba rute no programa misa fúnebre ne’ebé sei realiza iha loron aban, liuhusi konferénsia imprensa konjunta.
Rute sei hahú movimentu lori amu Papa nia imajen no ai-funan sira husi Bidau-Lesidere mak ba to’o Tasi-tolu.
“Aban dadeer tuku 09h00 sei hahú mobiliza, ai-funan Papa movél katak karreta ne’ebé uluk amu Papa sa’e no retratu husi sua santidade amu Papa nian, husi prasa estatua na’in-feto Lesidere ba Tasi-tolu”, Vigáriu Episkopál Pastorál Arkiodioseze Dili, Pe. Jovito Rego de Jesus Araújo, ba jornalista sira iha Tasi-tolu, ohin.
Vigáriu Episkopál Pastorál Arkiodioseze Dili ne’e informa katak, rute sei hahú husi Lesidere ba Motael – Nunsiatura apostólika, sei para minutu ida ka rua iha ne’ebá, hodi fó omenajen.
Nune’e husi Motael sei kontinua ba Palásiu Prezidensiál, Aitarak-Laran, Fatuhada, Komoro no konklui ikus iha Tasi-tolu.
Iha parte movimentu ida-ne’e, komunidade sira bele asiste iha estrada tuir rute ne’ebé mak iha; hahú husi Lesidere to’o iha Tasi-tolu.
Iha parte lorokraik, órgaun soberanu, eis-titulares, membru korpu diplomátiku, no ajénsia sira husi internasionál katak sei laiha konvite ofisiál.
No komisaun konjunta prefere atu uza veíkulu ho númeru matríkula ofisiál nian hodi bele asesu ba iha área estasionamentu ne’ebé designadu ona iha Tasi-tolu.
“Ba sarani sira-ne’ebé ho transporte privadu sei para hotu iha tasi-ibun, Tasi-tolu nian, no mós aeroportu internasionál Nicolau Lobato, bainhira parte tasi-ibun Tasi-Tolu nian nakonu,” nia lulik ne’e apela.
Autoridade relijiaun Katólika ne’e hatutan, sarani sira husi parte oeste (Ermera, Likisá, Bobonaro) transporte sei para iha Pelikan paradise Tibar, enkuantu ba mídia sira komisaun prepara ona fatin ne’ebé designadu.
La permite drone no labele informasaun falsa
Nia apelu, ba sira-ne’ebé hakarak hala’o operasaun iha fatin misa Tasi-tolu, tenke halo koordenasaun ho komisaun organizadora atu nune’e bele rejistu.
“Sei la permite atu utiliza drone ne’ebé laiha autorizasaun (sein kuñesimentu). Husi biban ida-ne’e mós atu anúnsiu ba públiku atu labele fiar informasaun falsu husi ema sira-ne’ebé laiha edukasaun, morál no responsabilidade hodi públika informasaun falsu sira iha mídia sosiál, hodi hamate espíritu fiar sarani Katólika timoroan hotu ne’ebé hakarak partisipa ativa iha misa fúnebre ba sua santidade Papa Francisco nian”, nia anunsia.
Iha oportunidade ne’e, Ministru Administrasaun Estatál, Tomas do Rosário Cabral, aviza katak aban iha Tasi-tolu atu selebra fila-fali hamutuk ho vatikanu sira-ne’ebé aumezmu tempu selebra hotu iha ne’ebá.
“Ita mai selebra despedida ho nia (Amu papa) tanba fatin ne’e uluk ita-nia sua santidade amu Papa Francisco hamriik ba”, Ministru ne’e hateten ho relembra.
Iha fatin hanesan, Komandante Jerál PNTL, Komisáriu Jerál Polísia, Henrique da Costa informa, “Kona-ba preparasaun parte seguransa nian ho másimu ona no aban sei koloka ita parte hotu-hotu hodi asegura situasaun”.
Notísia relevante:Informasaun taka dalan provizóriu ne’e ‘Hoax’
Jornalista: Alexandra da Costa
Editór: Rafael Ximenes de A. Belo
