VIKEKE, 25 Abríl 2025 (TATOLI)—Udan-boot ne’ebé akontese iha semana ne’e rezulta rai iha estrada Lugatoi monu. Estrada ne’e lokaliza iha suku Kraubalu, postu Vikeke Vila, munisípiu Vikeke.
Notísia Relevante: Empreza Don Boaventura hahú normaliza estrada Lugatoi Viqueque
“Estrada Lugatoi ne’e rai monu beibeik, nune’e iha tinan kotuk autoridade sira simu pose, halo kedas asaun dahuluk hodi normaliza dalan Lugatoi nian. “Iha momentu ne’ebá, ita laiha orsamentu, maibé ami inisiativa konsege koordena ho empreza Ovem 2 halo normaliza dalan Lugatoi hodi fasilita movimentu transporte kiik sira liuliu ambulansia transfere moras sira husi postu bá Internamentu Vikeke,” Prezidente Autoridade Munisipál (PAM) Vikeke, Francisco C.S de G. Soares, informa Agência Tatoli, iha nia kna’ar fatin, ohin.
Maibé, nia dehan, durante ne’e karreta boot sira mós uza dalan referida entaun agora rai komesa halai ka rai monu fila-fali tanba falta ema nia konxiénsia utilizasaun dalan.
“Karreta boot sira hanesan fuzu no bus sira uza hotu dalan Lugatoi, tan ne’e mak agora rai komesa halai no monu iha parte mota nian ne’e. Maibé, ha’u koordena fila-fali ona ho empreza Ovem 2 hodi halo normalizasaun fila-fali atu fasilita ambulánsia no transporte kiik sira ultrapasa,” nia dehan,
Nune’e, nia husu, komunidade bainhira empreza Ovem 2 halo ona normalizasaun ne’e karreta boot liuliu fuzu sira labele liuhusi dalan Lugatoi, atu nune’e rai ne’ebé uza ba normlizasaun labele monu tán.
“Ha’u husu mós ba komunidade suku Karaubalu ita tau-matan hamutuk ba dalan Lugatoi hodi asegura karreta kiik sira no ambulánsia. Se ita la kontrola hamutuk mak agora dalan Lugatoi fó ameasa fali ona,” nia dehan.
Aleinde ne’e, nia relata, prosesu reabilitasaun estrada husi Betisi to’o iha hospitál antigu Vikeke Vila daudaun ne’e Ministériu Obra Públiku hahú prosesu hodi halo reabilitasaun.
“Kona-ba reabilitasaun ba estrada vila laran ne’e iha ona prosesu. Ne’ebé, iha semana oin, ha’u sei ba hasoru Ministériu Obra Públika nasionál hodi ko’alia estrada husi Betisi to’o hospitál antigu nian. Tanba, tuir planu ne’e dalan referida sei hahú implementa iha fulan-Maiu to’o Juñu, Ministériu Obra Públika hahú orienta empreza responsavél konstrusaun,” nia hateten.
Tuir nia, MOP relata katak prosesu daudaun ne’e iha ona empreza responsavél maibé ida-ne’ebé mak atu kaer obra, nia parte seidauk hatene maibé importante ezekuta konstrusun estrada atu fasilita transporte.
“Durante ne’e, estrada referida sai preokupasaun ba komunidade munisípiu Vikeke, enkuantu kona-ba orsamentu obra estrada ne’e MOP nasionál mak hatene,” nia dehan.
Jornalista : Vitorino Lopes da Costa
Editór : Cancio Ximenes
