DILI, 26 Abríl 2025 (TATOLI)—Kruz Vermella Timor-Leste (CVTL-sigla portugés) servisu hamutuk ho Ministériu Saúde liuhosi Servisu Nasionál Ambulánsia Emerjénsia no Médika (SNAEM), prepara ona ekipa hamutuk na’in-30 iha Tasi Tolu, nune’e bele halo primeiru sokoru ba sarani sira-ne’ebé mak moras iha misa laran.
“Ami (CVTL) koordena ona ho Ambulánsia Nasionál atu orsida kalan halo asisténsia ba sarani sira-ne’ebé mak moras, tanba parte SNAEM, I.P. prepara ona kareta ambulánsia tolu,” Sekretáriu Jerál CVTL, Luís Pedro Pinto, dehan ba jornalista sira iha Tasi-Tolu, sábadu ne’e.
Notísia relevante: Misa fúnebre Papa Francisco sei hala’o iha sábadu lorokraik iha Tasi-tolu
Nia hateten, husi parte CVTL hamutuk ho SNAEM peskiza ona fatin misa Tasi Tolu no ekipa sira-ne’e sei bá mobiliza iha fatin referidu hahú iha tuku 13:00 Otl.
“Ami prepara medikamentu mak hanesan sasán ba primeiru sokoru nian, sasán bázika ba sarani sira-ne’ebé mak monu no karik monu mak ekipa haree nia kondisaun ladún di’ak, entaun Ambulánsia Nasionál evakua bá iha Hospital Nacional Guido Valadares hodi hetan asisténsia husi médiku sira,” Luís tenik.
Entretantu, tuir observasaun TATOLI nian katak ambulánsia tolu ne’ebé mak prepara husi SNAEM daudaun ne’e iha ona fatin Tasi Tolu hodi atende sarani sira-ne’ebé mak moras.
Jornalista: Felicidade Ximenes
Editór: Xisto Freitas da Piedade
