DILI, 26 Abril d2025 (TATOLI) – Domingas Soares Maia Tavares, salmista ba misa papál realizada iha loron 10 fulan Setembru iha tinan kotuk, iha Tasi Tolu, konsidera Papa Francisco hanesan “figura mundiál ne’ebe simples, domin na’in no haraik-an”.
“Iha momentu ne’ebá, ha’u mak hananu salmu iha misa Tasi Tolu. Ha’u pesoalmente senti triste tebes , tanba lakon aman ida”, Domingas Soares Maia Tavares dehan ba Tatoli, liuhusi telefone, ohin.
Salmista husi korru Santa Cecília Balide rekorda katak, maske Papa “mate”, husik hela mensajen fiar, domin no dame ba povu timoroan durante nia visita iha loron 09-11 Setembru iha 2024, iha Timor-Leste.
“Ha’u pesoalmente senti mensajen [Papa] nian importante no rai hela ba sarani sira iha Timor mak tenki hametin ita-nia fiar hanesan iha tema vizita amu Papa nian: Atu ita-nia fiar sai ita cultura. Amu Papa mós fó hanoin ba ita atu hadomi malu”, akresenta.
Tuir salmista, mensajen hirak ne’e mós, Amu Papa hato’o bai ukun na’in no líder polítiku sira iha Timor-Leste, oinsá atu bele hadomi ema simples sira no nia povu.
Domingas Soares Maia Tavares haktuir katak korru sira ne’ebé mak uluk iha Diocese tolu nian ne’ebé kanta iha misa vizita papál mak sei hamutuk fila fali hodi hananu iha misa ne’ebé sei hala’o iha Tasi Tolu.
“Ami hamutuk ema 250, husi númeru ne’e 33 husi Dili, mak sei hananu iha misa ba serimónia fúnebre Papa ni’an ne’ebé sei hala’o iha Tasi Tolu”, konklui.
Notísia relevante:Sarani sira matan-been monu akompaña retratu Papa Francisco
Jornalista : Jesuína Xavier
Editora : Isaura Lemos de Deus
