DILI, 26 Abril 2025 (TATOLI) – Sarani katólika timoroan lembra Papa Francisco nia simplisidade durante vizita entre loron 09-11 fulan Setembru iha tinan kotuk.
Afirmasaun ne’e hatoo husi sarani sira wainhira halibur malu iha Estátua Nossa Senhora Imaculada da Conceição Lesidere iha tuku 08h00 dadersán hodi hein halo komboiu ne’ebé akompaña husi karreta rua ne’ebé Santu Padre sa’e bainhira mai vizita Timor-Leste iha Setembru tinan kotuk no lori ai-funan bá altár santu ne’ebé prepara ba misa loraik nian.
Zélia da Costa, hanesan sarani katólika, afirma katak “mezmu Santu Padre lakon ona iha mundu ne’e, nia klamar sei nafatin metin ha’u-nia fuan no sei rai metin nafatin iha ha’u nia memória”.
Iha fatin hanesan, Genilda Maia subliña katak sarani hotu sente lakon líder katóliku ida. “Ha´u sei lembra Papa nia hahalok ne’ebé mai vizita ita-nia rai iha tinan kotuk, nia lahaketak Igreja sira seluk, maibé nia hakuak hamutuk hodi halo orasaun”, dehan ba jTatoli iha Lisidere, Dili.
Joven ne’e mós hateten buat hotu ne’ebé Papa hanorin ba sarani sira “mak tenki hara’ik-an no hadomi labarik no ema ki’ak sira. Ida ne’e hanesan lisaun ida hodi hanorin hela ba sarani sira atu banati tuir”.
Notísia relevante:Domingas Tavares: Papa figura mundiál ne’ebé simples, domin na’in no haraik-an
Jornalista: Ivonia da Silva
Editora: Isaura Lemos de Deus
