DILI, 26 Abríl 2025 (TATOLI)–Sarani sira iha sábadu loraik ne’e hahú nadodon bá Tasi Tolu atu tuir misa requiem Papa Francisco nian.
Sarani hirak-ne’e maihusi bairru-bairru sira iha kapitál Dili no mós balun maihusi munisípiu sira. Maski loron manas no hariis kosar, más sira hakat ho kontente ho reza no balun hananu requiem hodi dirije ba Amu-Papa.
Notísia relevante: PNTL garante seguransa misa fúnebre Papa Francisco iha Tasi Tolu
Tuir TATOLI nia observasaun, aleinde la’o ain, sarani sira balun ho idak-idak nia transporte hodi la’o bá diresaun Tasi Tolu. Iha dalan-dalan, kolokadu mós forsa seguransa no defeza hodi asegura sarani sira-nia movimentu.
”Misa hahú iha tuku 18:00, maibé ami mai uluk tanba ho hanoin ida katak tinan kotuk Amu-Papa nia vizita halo ha’u fuan moras tebes, entaun mai antes atu halo orasaun ba nia, tanba Amu-Papa ida-ne’ebé mak simples tebes no karater ne’ebé mak nakonu ho domin,” Sarani Angélica da Costa dehan iha Tasi Tolu, sábadu ne’e.
Nia hateten, banhira rona liafuan ida dehan ‘Timor iha ha’u fuan’, halo sarani sira hamonu matan-been tanba hanoin nia domin no simplisidade ida-ne’e.
”Bainhira ha’u rona Amu-Papa ko’alia dehan Timor iha nia fuan, halo ha’u nia fuan moras no ha’u tanis. Ha’u hanoin nia liafuan sira-ne’ebé nia ko’alia bainhira vizita Timor,” Angélica haktuir.
Nia esplika, oras ne’e Amu-Papa hakat ona ba moris ida nia rohan hodi hamutuk ona ho Maromak, nune’e nia klamar bele tulun nafatin ema tomak iha mundu liuliu sarani sira iha Timor-Leste.
Garante misa sei la’o di’ak
Entretantu, Xefe Soldado de Cristo, Cecília Ribeiro, garante misa requiem ba Amu-Papa iha Tasi Tolu sei la’o ho di’ak.
Nia dehan ekipa Soldado de Cristo hamutuk ho Eskuteiru THS/THM preparadu ona atu akompaña sarani sira tuir misa requiem tuir oras ne’ebé mak determinadu.
”Ami-nia preparasaun ba misa ida-ne’e hahú kedas iha loron 21 Abríl ne’ebé Amu Papa hakotu iis, iha-ne’ebé ami konsentra hotu iha Lesidere hamutuk ho Eskuteiru THS/THM. Entaun, orientasaun sira-ne’e ami rona husi Polísia Nasionál Timor-Leste (PNTL) tanba ami servisu hamutuk ona dezde Papa nia vizita mai Timor. Ami asegura katak buat hotu sei la’o ho di’ak,” Cecília relata ba TATOLI iha ámbitu misa requiem ne’e.
Nia dehan, membru Soldado de Cristo daudaun kolokadu ona ba fatin idak-idak nune’e bele asegura sarani sira tuir misa.
”Ami-nia membru kolokadu ba fatin sira-ne’ebé sarani sira hamrik ba. Balun ami tau iha altár oin, balun iha laran no balun iha li’ur hodi asegura sarani sira tuir misa ho di’ak,” nia esplika.
Jornalista: Felicidade Ximenes
Editór: Xisto Freitas da Piedade
