Assanami sei aprezenta bá KM buka solusaun ba sala pediatria HNGV la sufisiente
DILI, 27 Abríl 2025 (TATOLI)—Vise Primeiru-Ministru no Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, hateten tempu badak sei aprezenta ba Konsellu Ministru (KM) atu buka solusaun ba sala pediatria iha Hospital Nacional Guido Valadares (HNGV), ne’ebé daudaun ne’e la sufisiente atu akumula labarik sira hala’o tratamentu (baixa).
“Ha’u simu informasaun sira-ne’e husi doutór sira iha HNGV katak labarik sira moras tama iha ospitál númeru sa’e maka’as, entaun kama iha HNGV ne’e la sufisiente atu akumula hotu labarik sira atu hala’o baixa ba,” Assanami hateten ba jornalista sira iha HNGV, Bidau, domingu ne’e.
Nia dehan, parte HNGV mós aranja korredór hodi tau labarik sira iha ne’ebá maibé kontinua nakonu.
“Ita haree situasaun ne’e, la’ós problema sira-nian, maibé problema Estadu no nasaun nian, tanba ita presiza duni atu loke tan fatin luan ba labarik sira. Iha reuniaun Konsellu Ministru mai ne’e, ha’u sei aprezenta no haree to’ok fatin ne’ebé mak urjente atu ita labele husik hela labarik sira iha korredór li’ur sira-ne’e,” nia informa.
Notísia relevante: HNGV rekoñese sala pediatria iha limitasaun kama
Assanami hatutan, daudaun ne’e halo koordenasaun atu oinsá halo transferénsia labarik balun ba iha ospitál Lahane, tanba fatin iha-ne’ebá mamuk sei iha.
“Kuarentena iha Tasi Tolu ne’e, ami fó orden ona, más fatin kuarentena ne’e, ministériu seluk mak haree iha-ne’ebá. Ospitál Lahane sei iha fatin, maibé tenke halo koordenasaun ho Ministériu Saúde, tanba ita-boot sira hatene katak Guido Valadares ne’e, nia jestaun ne’e semi outónomu, katak tenke rona husi ministériu. Ezemplu, bainhira alarga bá fali Lahane ka klínika Bairro Pité no bá fali Sentru Saúde Vera Krúz, ne’e tenke liu fali husi Ministériu Saúde, entaun sira tenke halo koordenasaun atubele haree no tau-matan bá ne’ebá,” nia dehan.
Iha fatin hanesan, Diretór Servisu Apoiu Diagnóstiku Terapéutiku iha HNGV, Vidal de Jesus Lopes, haktuir espasu iha ospitál sira-ne’e, nia sempre informa ba públiku sira katak HNGV loron-loron pasiente sira sempre tama barak, entaun fatin la sufisiente atu tau labarik sira.
“Tanba ne’e, ami hetan autorizasaun husi Ministériu Saúde, ami utiliza ona ospitál Antonio Carvalho Lahane. Agora daudaun utiliza hela. Ami mós servisu hamutuk ho Servisu Saúde Munisipál Dili, liuliu espesifikamnte Saúde Formosa ho Sentru Saúde Vera Krúz, karik pasiente balun ne’ebé iha HNGV mak nakonu demais ona, balun ne’ebé kondisaun kamaan uitoan ami transfere bá iha-ne’ebá, hodi kontinua halo atendimentu iha Sentru Saúde Vera Krúz ho Formosa,” Vidal Lopes konklui.
Jornalista: Felicidade Ximenes
Editór: Xisto Freitas da Piedade
