Governu husu Empreza CCECC aselera konstrusaun sala pediatria no ICCU
DILI, 27 Abríl 2025 (TATOLI)—Governu liuhusi Vise Primeiru-Ministru no Ministru Koordenadór Asuntu Sosiál, Mariano Assanami Sabino, husu Empreza China Civil Engineer Construction Cooperation (CCECC) atu aselera konstrusaun sala pediatria andár lima no Unidade Kardiolojia Kuidadu Intensivu (ICCU-sigla inglés) iha Hospital Nacional Guido Valadares (HNGV).
“Konstrusaun ospitál foun rua mak halo iha HNGV. Ida Governu rasik mak tau orsamentu mak sala pediatria andár lima no ICCU. Ida seluk hetan apoiu husi doadór Japaun mak halo konstrusaun andár haat ba maternidade nian,” Mariano Assanami Sabido dehan ba jornalista sira iha HNGV, Bidau, domingu ne’e.
Nia haktuir, andár lima ne’e, sei prepara ba labarik sira no inan isin-rua sira mak andár haat, entaun ida-ne’e parte HNGV iha autónomu atu bele halo jestaun rasik.
“Ita haree konstrusaun sala pediatria andár lima no ICCU ita husu empreza atu iha fulan-Dezembru tinan 2025 bele entrega ona ba Governu,” nia solisita.
Nia dehan, empreza rasik hato’o katak sira sei finaliza iha tinan ne’e, tanba servisu todan liu mak hatama besi ba rai okos ne’e, más servisu todan sira liu tiha ona, agora iha faze ida servisu kamaan nian.
Notísia relevante: Xefe Governu observa direta funsionamentu no konstrusaun pediátria iha HNGV
Iha fatin hanesan, Diretór Servisu Apoiu Diagnóstiku Terapéutiku HNGV, Vidal de Jesus Lopes, hateten kona-ba konstrusaun ba edifísiu andár liman ne’e, sei terminadu iha fulan-Dezembru tinan ne’e.
“Tenke terminadu tuir kontratu ne’ebé iha. Espera katak sira bele kumpri kontratu sira-ne’ebé iha,” Vidal tenik.
Antes ne’e, Diretora Servisu Administrasaun Finanseira no Lojístika HNGV, Sara Maria Xavier, dehan kona-ba progresu konstrusaun ba sala pediatria andár lima (5) iha HNGV ne’e tama ona ba 37%.
“Progresu kontrusaun Pediatria andár lima, agora dadaun ninia persentajen atinje ona ba 37% no andár primeiru besik atu konkluidu ona. Ha’u la lembra didi’ak nia progresu kontrusaun pursentu hira, maibé iha terrenu andár ida hahú ona. Espera katak bele ramata iha fulan-Abríl ne’e ka fulan-Maiu nia laran,” Sara dehan.
Aleinde ne’e, Diretór Empreza China Civil Engineer Construction Cooperation (CCECC), Liang Quing, komprometidu katak sei konklui projetu ida-ne’e ho infraestrutura ne’ebé kualidade ba Governu no povu Timor Leste.
Antes ne’e, Governu prevee ho montante orsamentu hamutuk millaun 9.3 no konstrusaun refere ho durasaun tinan rua, hahú 2023-2025. Lansamentu ba edifísiu pediatria andár lima (5) no ICCU iha HNGV ne’e iha inisiu fulan-Janeiru 2023.
Jornallista: Felicidade Ximenes
Editór: Xisto Freitas da Piedade
