Governu komprometidu mellora atendimentu servisu saúde ba povu
DILI, 28 Abríl 2025 (TATOLI)—Vise-Ministru ba Asuntu Parlamentár, Adérito Hugo da Costa, rejista preokupasaun sira husi reprezentante povu iha Parlamentu Nasionál (PN), nune’e Governu komprometidu mellora liután serbisu saúde ba povu tomak.
“Governu liuliu Ministériu Saúde kontinua haree ba esperiénsia no akontesimentu iha terrenu ba atensaun saúde nian, hanesan menus médiku, infermeiru, parteira, kondisaun infraestrutura, kondisaun transporte hanesan ambulánsia sempre falla tanba kazolina laiha ka falta manutensaun la’ós operasionál para atu halo tanba menus atensaun,” Reprezentante Governu responde ba preokupasaun Deputadu sira-nia iha reuniaun plenária PN, segunda ne’e.
Governante ne’e iha esperansa Ministra Saúde ho nia Vise-Ministru na’in-rua bele tau atensaun ba kestaun padraun ospitál.
“Se ambulánsia iha hela mais manutensaun laiha ne’e labele iha razaun katak kazolina laiha, karreta la operasionál, ne’e labele tau ba kestaun, ita labele resposta ida-ne’e ba povu, ne’e ita sira tuur iha kargu ne’e ninia responsabilidade atu haree, a não ser ita ko’alia buat seluk, kondisaun klínika ladi’ak ona ou falta médiku ne’e se bele ko’alia husu deskulpa, tanba tenke halo prosesu rekrutamentu atu hetan médiku espesializadu la’ós fasil, ita iha médiku jerál barak, maibé médiku espesialidade ne’e oituan, tanba ne’e iha sentru no postu saúde balun laiha médiku espesializadu,” nia akresenta.
Notísia relevante : Prezidente Komisaun F husu HNGV kontrola prezensa estajiáriu
Vise-Ministru dehan, Governu ezije nafatin ba ministériu relevante atu tau-atensaun ba padraun operasionalizasaun iha fasilidade saúde sira.
Deputada Bankada Opozisaun husi FRETILIN, Verónica Fernandes, liuhusi deklarasaun polítika hato’o preokupasaun kona-ba jestaun Hospital Nacional Guido Valadares (HNGV) relasiona ho pasiente ida ne’ebé hetan atendimentu husi estajiáriu foin lalais ne’e mate.
Aleinde ne’e, observa no rona keixa husi públiku iha fasilidade saúde balun tantu iha área urbana no rurál fasilidade limitadu, laiha aimoruk, falta pesoál saúde no dalaruma mós ekipamentu médiku la adekuadu.
Deputadu PLP, Helder Freitas, preokupa ho informasaun katak dirijente balun iha área saúde asume tiha kargu diretór ida to’o de’it fulan-ida ka rua hasai tiha fali hodi tau fali kargu xefia foun, nune’e fó impaktu ba servisu saúde ba povu.
Deputadu Bankada Governu husi CNRT, Patrocínio dos Reis Fernandes, husu populasaun labele tauk ba ospitál tanba fasilidade saúde sempre disponibiliza atendimentu.
“Lamentasaun sira ne’ebé mai ne’e atu ami mós nafatin enkoraja povu labele tauk bá ospitál tanba médiku no enfermeiru ita-nia oan ita buka hadi’a nafatin sistema hanesan mós governasaun sira ba kotuk katak, iha duni buat ruma presiza hadi’a iha razaun presiza hadi’a nafatin, ita la konkorda mak ospitál kolapsu karik, tanba funsionamentu la’o hela, mais presiza duni atu hadi’a,” nia katak.
Deputadu dehan, presiza tau-atensaun ba preokupasaun kona-ba troka kargu xefia iha parte saúde tanba bele afeta ba prestasaun serbisu.
Jornalista : Nelson de Sousa
Editora : Julia Chatarina
