BOBONARU, 28 Abríl 2025 (TATOLI)—Ministériu Koordenadór Asuntu Ekonómiku (MKAE) liuhusi Insepesaun Jerál Traballu, segunda ne’e, hamutuk autoridade munisípiu, empregadór no traballadór sira komemora loron mundiál Seguransa ho Saúde no Traballu iha Bobonaru [selebra kada 28 Abril] ho atividade semináriu kona-ba ‘Revulucionar A Seguransa E Saúde no Trablaho’.
Xefe Unidade Avaliasaun no Monitorizasaun Gabinete Koordenadór Jerál MKAE, Fransisco Xavier Fátima Soares, esplika objetivu realiza atividade ne’e atu fó hanoin no disemina lei traballu ba empregadór no traballadór sira iha munisípiu Bobonaru.
Notísia Relevante: Presiza Lei Seguransa Saúde Traballu Hodi Reforsa Servisu IJT
“Nune’e empregadór sira bele intende didi’ak fundamentu husi lei ne’e, hodi nune’e bele aplika iha ida-idak ninia servisu fatin ho tratamentu ne’ebé dignu ba ita nia-traballadór sira,” Nia informa ba jornalista sira, iha salaun administrasaun postu administrativu Maliana
Iha komemorasaun ne’e ekipa Crus Vermelha Timor-Leste (CVTL) Filiál Maliana partila Informasaun no simulasaun Primeiru Sokoru ba partisipante sira, nune’e akontese asidente ruma iha servisu fatin, empregadór sira bele halo asaun hodi proteje ninia trabalaladór sira.
Inspetór Jerál Traballu, Frederico Pereirra de Matos, reforsa aleinde atividade ne’e ekipa Bombeiru Munisípiu Bobonaru mós halo simulasaun kombate Inséndiu iha servisu fatin ba Empregadór no Traballadór sira.
“Dalaruma ahi han mós bele akontese ema mate no etragus barak, entaun sira halo simulasaun oinsá uza istintór ‘Pemadang Kebakaran’ atu ema bele hatene wainhira ahi ruma akontese, nune’e labele lori vítima,” nia dehan.
Konsilleiru Kámara Komérsiu Timor-Leste (CCI-TL, sigla portugés) munisípiu Bobonaru, Norberto José, hato’o agradesimentu ba Governu ne’ebé deside komemora loron mundiál ne’e iha munisípiu Bobonaru.
Tuir nia, dekretu-leí foun kona-bá Seguransa Saúde ba Traballadór ne’e importante tebes atu empregadór no traballadór sira hatene.
“Ida-ne’e buat foun ida. Ba Empregadór, emprezáriu nune’e mós ba traballadór sira para depois ida-idak bele hatene husi lei ne’e, papel emprezáriu sira-nian mak ida ne’ebé, depois papél traballadór sira-nia, iha ne’ebé, nune’e depois hotu-hotu bele hatene hodi bele fó seguransa di’ak, seguru, ijene ba ita-nia traballadór sira iha empreza ida-idak ne’ebé fó servisu ba traballadór sira,” nia dehan.
Nia haktuir, antes ne’e CCI-TL mós apoia Sekretáriu Estádu Formasaun Profisionál no Empregu (SEFOPE) halo ona sensibilizasaun leí Traballu ba Empregadór no Traballadór sira iha Munisípiu Bobonaru.
“Ita agradese, ohin loron traballadór sira la barak ona, sira protesta kona-bá sira nia direitu iha empreza. Maibé, presiza hadi’ak kondisaun balun, em relasaun ho sira-nia seguransa ba Saúde. Purtantu ida-ne’e iha lei iha, ita espera katak kuandu empregadór sira hatene ida-ne’e sira sei implementa. Purké, se lae, Inspesaun Jerál Traballu tun mai, ita sei kona sansaun selu multa ba Esaádu,” nia dehan.
Enkuantu atividade ne’e partisipa masimu husi empregadór lokál no estranejeiru sira-ne’ebé loke negósiu iha kapitál Maliana inklui empregadór husi PT Hutama Karya, Bina Mitra Indosejahtera (BMS) no Minarta Duta Hutama.
Notísia Relevante : Viola Lei Traballu, IJT Aplika Multa ba Empreza 747
Jornalista : Sergio da Cruz
Editór : Cancio Ximenes
