DILI, 10 outubru 2019 (TATOLI) – Inspesaun Jerál Traballu (IJT) aplika ona multa ba empreza nasionál no internasionál hamutuk 747 iha Timór laran ho razaun viola lei traballu.
“Hahú hosi trimestre dahuluk to’o terseiru, Inspesaun Jerál Traballu hala’o ona vizita inspesaun hamutuk 1.144. Hosi atividade inspesaun ne’e, ami hatama ona osan ba kofre Estadu. Tuir dadus ne’ebé iha hatudu katak ami prodús auto adverténsia (peringatan) ba kompañia sira hamutuk 25 no aplika auto notísia (selu multa) hamutuk 747 maka ami prodús ho totál osan $368.679. Ami aplika tanba empreza la kumpri lei traballu no seguransa traballu, entaun IJT uza kompeténsia hodi aplika sasaun”, Inspetór Jerál Traballu Rofino Lopes dos Reis iha nia serbisu fatin Kaikoli, ohin.
Nia hatutan, valór koima ne’ebé IJT aplika bazeia ba lei traballu katak mínimu ho $230. Nune’e valór ne’ebé IJT aplika ba empreza 747 ne’e depende ba regulamentu ne’ebé empreza refere viola.
Inspetór ne’e esplika durante sira hala’o inspesaun la’ós de’it atu identifika problema, maibé mós halo sosializasaun lei traballu ne’e ba empreza no traballadór sira.
“Dezde estabelese lei ne’e IJT hala’o sosializasaun tantu iha nasionál to’o munisípiu, tan ne’e ami sei la halo ona iha munisípiu, maibé sei bá halo to’o iha suku”, dehan nia.
Hodi esklarese tan katak, durante sira halo inspesaun to’o aplika multa, IJT identifika katak empreza balu seidauk komprende didi’ak lei traballu maibé iha kompañia balu maka ho intensaun hakarak viola duni.
Multa ne’ebé IJT aplika ba empreza sira ne’e barak liu maka empreza internasionál.
Jornalista: Antónia Gusmão
Editora : Maria Auxiliadora
