DILI, 28 Abríl 2025 (TATOLI)-Universidade Katólika Timorense (UCT, sigla portugés), sei oferese bolsa estudu ba timoroan na’in-50 liuhusi Governu nia projetu Escola Superior de Edução Raiz (ESER).
“Ensino Superior Raiz ne’e projetu ne’ebé mai-husi governu nian. Konsellu Ministru entrega ba UCT atu implementa projetu ida-ne’e ho nia durasaun tinan 12. Se aban bainrua forsa iha ona bele hamrik mesak, maibé iha momentu ida-ne’e Governu fó konfiansa ba UCT atu halo projetu ida-ne’e”, dehan Padre Joel Casamiro Pinto nu’udar Reitór UCT, ba jornalista TATOLI iha nia eskritóriu Balide, segunda ne’e.
Tuir amu projetu ida-ne’e presiza asina akortu ho Ministerio Ensinu Superiór no Siénsia Kultura (MESSK), kona-ba dekretu lei governu atu bele assegura projetu ida-ne’e.
“Dekretu lei govenu tenke iha tanba depois Governu-ida troka projetu ensinu superiór ne’e kontinua nafatin se-lae governu-ida mosu mai muda tuir nia hakarak, bele hapara, ba oin susar tanba ne’e presiza dekretu lei-ida husi governu, ami hein hela prosesu ida-ne’e”, dehan padre.
Reitor ne’e mós informa kona-ba rekrutamentu bolsu estudu ba tinan ida-ne’e ema na’in 50, UCT sei foti bolseiru sira husi munisípiu 13 inklui Ataúru.
“Tinan ida-ne’e ita-sei rekruta ema na’in-50, ita iha munisípiu 13 inklui ho Ataúru sei foti representa munisipiu ida ema nain rua ou tolu, maibé ne’e tenke halo selesaun ida ho rigór tanba eskola prepara ema ba profesór ne’e la’ós vontade de’it, maibé tenke prepara”, hateten Reitór UCT.
Nia akresenta tan tinan ida-ne’e projetu eskola superiór raiz sei tau prioridade ba siénsia naturál tanba iha Timor professór siénsia naturál uituan loos.
“Ami la’ós hanorin sira atu lee de’it maibé sira prátika iha laboratóriu. Governu fó ona osan ami disponiviliza laboratóriu atu bele assegura prosesu aprendizajen no preparasaun ba profesór sira ne’e la’o ho di’ak”, nia dehan.
Nia mós haklean sei halo teste ida iha UCT no sei kolabora ho Ministériu Edukasaun tanba ministériu mak sei halo online teste ba bolseiru sira.
“Ami mós sei halo teste komputadór ho oras ne’ebé determinadu kuandu nia passa parabéns no ida la passa mak sei la iha diretu ba bolsa ne’e rasik”, dehan.
Reitór salienta tan katak orsamentu ne’e mak Governu aloka ba projetu ne’e hamutuk rihun atus tolu resin.
“Tanba bolseiru sira ne’e sei mai eskola de’it sira la selu eskola ne’e gratuita no sei tulun tan sira nia alojamentu se sira hela iha família ita fó de’it balun ba atu bele uza ba transporte projetu governu nian so ita realiza de’it ”, nia hatete.
Reitór informa fulan-Maiu sira komesa halo ona rekrutamentu no iha fulan Jullu ne’e hahú ona aula semester pre-universidade (SPU).
“Semester Pre-Universidade ka dehan semester zero sira tenke prepara sira nia-aan iha língua portuguesa ho profesionalidade boot mak língua portugueza tenke hatene no Inglesa, se sira la hatene eskola sei prepara sira fulan-neen nia laran no metodolojia estuda labarik sira sekundáriu remata ona maibé la hatene maneira estuda entaun ami tenke prepara sira estuda iha metodolojia ne’ebé di’ak ”, nia tenik.
Notísia relevante: UCT simu estudante estranjeiru 144 ba kursu medisina
Jornalista : Osória Marques
Editora : Rita Almeida
