DILI, 29 Abríl 2025 (TATOLI)—Komisaun Antí-Korrupsaun (CAC, sigla portugés) halo investigasaun ba krime korrupsaun hamutuk 45 durante tinan 2024.
Husi kazu ne’e 28 hetan denúnsiu husi públiku no 17 hetan delegasaun husi Ministériu Públiku (MP).
“Investigasaun krime korrupsaun serbisu relasiona ho investigasaun krime korrupsaun nian, CAC konsege halo averiguasaun ba kazu hamutuk 28 ne’ebé hetan denúnsia husi públiku no rekolla rasik husi investigadór sira iha tinan 2024 inklui mós tinan anteriór,” Komisáriu CAC, Rui Pereira dos Santos, hato’o bainhira aprezenta CAC nia relatóriu anuál tinan 2024, ba Parlamentu Nasionál (PN), Tersa ne’e.
Notísia relevante : CAC notifika kargu diretór no xefia 76 iha Baukau
Nia dehan, husi rezultadu averiguasaun ne’e, CAC konsege halo auto-partisipasaun ba MP hamutuk ualu.
“Aleinde ne’e, tinan 2024, CAC hetan delegasaun kompeténsia husi Ministériu Públiku hamutuk kazu 17,” nia akresenta.
Nia hateten, husi totál kazu hirak ne’e, CAC konsege halo investigasaun no konklui ona relatóriu finál ba kazu neen hodi remesa ba MP. Kazu hirak ne’e, CAC halo depoimentu ba arguidu na’in-ida no testemuña na’in-22.
Jornalista : Nelson de Sousa
Editora : Julia Chatarina
