DILI, 29 Abríl 2025 (TATOLI) – Komisaun konjunta ne’ebé kompostu husi Arkidioseze Dili, Nunsiatura Apostólika no Governu hato’o agradesimentu ba kooperasaun husi parte hotu hodi garante susesu no solenidade eventu misa funerál hodi fó omenajen ba maktoban Papa Francisco iha loron 26 Abríl.
“Lori komisaun konjunta nia naran hakarak hato’o agradesimentu kle’an ba parte sira hotu ne’ebé fó ona apoia hahú husi loron segunda 21 Abríl to’o ita selebra misa funerál hodi presta omenajen ba Sua Santidade Papa Francisco”, haktuir dokumentu husi Governu ne’ebé Tatoli asesu, ohin.
Agradesimentu ne’e liuliu ba Ministeriu sira mak hanesan Administrasaun Estatál, Interiór, Obra Públika, Planeamentu no Investimentu Estratéjiku, Saúde, Solidariedade Sosiál no Inkluzaun, kúria diosezana no pároku sira, ajénsia pastorál, grupu kategoria ekleziál, no sarani sira hotu. Aleinde ne’e ba Ajénsia Telekomunikasaun sira, mídia nasionál no internasional, ho voluntáriu sira hotu.
“Momentu solene no sagradu ne’e halibur ita hamutuk nu’udar povu ida ho fiar ida hodi fó onra ba ita-nia aman espirituál ida ne’ebé dedika nia moris hodi serbí ema ki’ak sira, promove dame no harii ponte entre kultura no relijiaun oioin”, nota ne’e hateten.
“Ita hotu nia kompromisu, orasaun no kolaborasaun durante tempu ida-ne’e, hanesan espresaun boot no esensiál tebes husi povu Timór nia unidade no reverénsia ba Papa Francisco, hodi halo Sua Santidade nia omenajen ida-ne’e sai hanesan eventu ne’ebé signifikativu no dignu, nomós hodi hatudu ita hotu ninia agradesimentu no domin ba nia ne’ebé bainhira mai iha Timor-Leste husik hela mensajen furak mai ita no hateten katak nia laran monu mai ita rain no mai ita hotu”, dehan.
Komisaun konjunta husu atu lori Papa Francisco nia legadu espirituál, ninia mensajen no sasin kmanek sira, be sai hanesan bukae no forsa ba moris hodi tau-matan no serví ba kreda no povu Timor-Leste.
“Papa Francisco ne’ebé husik ona ita hodi hakat ba Aman Maromak ninia kadunan iha lalehan nafatin inspira ita hodi hala’o ita-nia moris nu’udar sidadaun no nu’udar povu Maromak nian be la’o iha rai Timor Lorosa’e fó sasin ba mundu tomak”, afirma.
Rekorde katak Papa Francisco hakotu iis iha loron 21 Abríl iha tuku 7h35 dadeer oras Itália, no tuku 2h35 oras Timor-Leste. Liu tiha ida-ne’e Governu hetan komunikasaun husi parte Igreja hodi hahú halo koordenasaun ba serimónia omenajen no preparasaun misa funerál ba Papa Francisco, no loron hanesan oras tuku 7 kalan Arkidioseze Dili, liuhusi Don Virgílio Kardeál do Carmo da Silva hala’o konferénsia imprensa hodi hato’o informasaun ba sarani Timor-oan sira hotu kona ba falesimentu Papa nian.
Don Virgílio ho ekipa konjunta hamutuk ho Nunsiatura Apostólika deside hodi fo tempu ba órgaun soberana no korpu diplomátiku sira presta omenajen durante loron 22-23 Abríl (hahú husi oras tuku 9 dader to’o 5 loraik), deside mós halo selebrasaun eukaristia no orasaun kontínua iha Santuáriu Mariano Lesidere, ne’ebé loke ba sarani katólika sira iha Dili, atu hasa’e orasaun ba Santidade Papa Francisco.
Atividade orasaun no misa hahú kedas iha loron segunda to’o dader 26 Abríl antes lori ai-funan, imajen, papa movel, lilin, komboiu husi Lesidere, Nunsiatura Apostólika, Palásiu Prezidensiál, Fatuhada, Komoro no kontinua bá iha Altár Santu Tasi Tolu, hodi prepara antes selebrasaun misa.
Notísia relevante: Rute no programa aban kona-ba misa fúnebre Sua Santidade nian iha Tasi-tolu
TATOLI
