KSTL rejista kazu violasaun traballu 45 iha trimestrál dahuluk
DILI, 29 Abríl 2025 (TATOLI) – Konfederasaun Sindikatu Traballadór Timor-Leste (KSTL), iha trimestrál (Janeiru, Fevereiru no Marsu) dahuluk tinan-2025 ne’e, rejista kazu violasaun ba traballu hamutuk haat nulu resin-lima (45), kompostu husi servisu públiku, otelária no komérsiu.
Vise-prezidente KSTL, Serafico Natalino Soares, relata, kazu sira ne’e rezolvidu ona. No, kazu sira ne’e mai ho forma sira hanesan serbisu la iha kontratu, serbisu liu oras, hapara husi serbisu fatin – kazu barak loos.
“Dalaruma akontese iha loja sira-ne’e no fatin konstrusaun sira. Maibé, daudaun ne’e kazu tolu mak iha hela prosesu nia laran hanesan kazu ida husi BRI nian, seluk ne’e husi kompaña sira”, Vise-prezidente KSTL hateten ba jornalista TATOLI, iha sede KSTL, Bemori Dili, ohin.
Notísia relevante:KSTL prefere Governu hasa’e saláriu mínimu nasionál
Kazu sira ne’e, tuir vise, keixa barak liu mai husi estabelesimentu komersiál sira hapara serbisu (loja), liu oras la selu no dalabarak traballadór sira-ne’ebé sai membru husi sindikatu ne’e, lahetan violasaun ida-ne’e, tanba sira hatene tiha ona sira-nia direitu, dever hanesan traballadór iha setór sira-ne’e.
“Kazu barak ne’ebé mak KSTL simu, dalabarak ami mós servisu hamutuk ho organizasaun ne’ebé haree ba asuntu traballu doméstika, no dalabarak mós ita hetan keixa barak husi traballadór sira ne’e”, nia haktuir.
Vise-Prezidente KSTL, Serafico Natalino Soares informa, kazu sira ne’e tama ba KSTL balun rezolvidu.
Nia hatutan, alende kazu sira temin, inklui mós kontratu no saláriu estandarnizasaun, no servisu ho oras ne’ebé mak naruk, kalan mós dalaruma hader ba haree labarik no hein ema nia oan sira ne’e.
“Maibé agora ne’e di’ak tanba KSTL iha organiza hodi tuun direta ba halo observasaun iha terrenu hodi define problema sira-ne’e tanba ami KSTL mós halo formasaun kada fulan ba traballadór sira oinsá atu hatene sira-nia oras servisu, komprende sira-nia kontratu serbisu. Ida-ne’e ita halo routina fulan-fulan”, nia informa tan.
Notísia relevante:KSTL husu PN ratifika konvensaun 190 elimina asedu ba traballadór
Entretantu, kategorizasaun kazu tolu hanesan, servisu públiku kompostu husi pesoál seguransa, pesoál limpeza, servisu iha Pertamina, servisu otelária hanesan iha restaurante sira no servisu komérsiu mak hanesan iha loja no emprez sira.
No, dadus akumulativu KSTL nian rejista katak kazu violasaun serbisu husi tinan-2024 hamutuk 105 no 102 mak rezolve ona tolu sei iha arbitrajen ba tribunál.
Jornalista: Alexandra da Costa
Editór: Rafael Ximenes de A. Belo
