DILI, 28 Abríl 2025 (TATOLI)—Diretór Jerál Ministériu Komérsiu no Indústria, Nelito Lima de Araújo, hateten merkadu fronteira daudaun ne’e iha faze konsultasaun.
“Diresaun Nasionál Komérsiu Esternu haree katak merkadu fronteira iha ona faze konsultasaun no mós halo ona dezeñu. Agora empreza aprezenta ikus ona mai iha Ministériu Komérsiu no Indústria (MCI-sigla portugés) nune’e halo kalkulasaun iha tinan ida-ne’e para prosesu bele la’o ona,” Nelito hateten ba TATOLI iha salaun MCI, Bebora, Dili, segunda ne’e.
Nia hateten, kona-ba empreza Governu seidauk loke konkursu, tanba daudaun ne’e sei iha faze konsultasaun.
“Merkadu fronteira ne’e tuir kalkulasaun orsamentu purvolta rihun $200-resin,” nia esplika.
Antes ne’e, Ministru Komérsiu no Indústria, Filipus Nino Pereira, hateten Governu liuhusi Ministériu Komérsiu Indústria seidauk intensaun atu reativa merkadu tradisionál iha área fronteira hanesan Suai iha Salele no Bobonaro iha Batugadé inklui Rejiaun Administrativa Espesiál Oekusi Ambenu (RAEOA).
Tuir Nino katak merkadu tradisionál iha área fronteira MCI seidauk iha intensaun atu reativadu, tanba presiza hatene kondisaun ho fasilidade lubuk ida, tanba teknikamente atu estabelese merkadu tradisionál iha área fronteira ho ninia risku sira seluk tan kona-ba seguransa no produtu sira seluk.
“Ita sei troka produtu iha komérsiu liuliu iha área fronteira no inklui fasilidade husi nasaun Indonézia. Ezemplu, merkadu tradisionál iha fronteira Salele Suai nian agora daudaun taka hela, nune’e haree nia vantajen sira-ne’e. Tanba, uluk ita reativa merkadu referidu ne’e iha Salele ikusmai dehan setór privadu mak fó atensaun sériu iha-ne’ebá, maibé tanba sira ladún proativu no merkadu tradisionál entaun la sustentável.Tanba ne’e, ita presiza halo diskusaun di’ak ho setór privadu hodi reativa merkadu tradisionál atu garante sustentabilidade,” Nino esklarese.
Jornalista: Felicidade Ximenes
Editór: Xisto Freitas da Piedade
