DILI, 29 Abríl 2025 (TATOLI)—Diretór Jerál Sekretaria Estadu Formasaun Profisionál no Empregu (SEFOPE), Carlito Rosário Cabral, relata Governu trasa hela ezbosu lei ida hodi regula traballadór doméstiku no empregadór doméstiku sira iha Timor-Leste.
Diretór Jerál dehan, ezbosu lei ne’e prevee kontratu traballu no saláriu mínimu ba traballadór doméstiku sira.
“Servisu hotu-hotu tenke iha kontratu no saláriu tenke bazeia ba saláriu nominál mínimu $115. Ezbosu lei ne’e ezije ita tenke kumpri regulamentu ne’ebé iha,” Carlito Rosário Cabral hateten iha nia kna’ar fatin, Kaikoli, tersa ne’e.
Tuir Carlito, traballadór doméstiku sira laiha kontratu eskrita, sira iha de’it negosiasaun verbál entre traballadór ho empregadór tanba sira iha nesesidade bázika sira.
Notísia relevante: KSTL husu Governu prioritiza revizaun saláriu mínimu ba traballadór
“Bainhira laiha regulamentu, Governu no Konfederasaun Sindikatu Traballadór Timor-Leste labele halo intervensaun, maski hetan violasaun ba traballadór sira-nia direitu. Tanba ne’e, ekipa jurídika SEFOPE halo hela ezbosu ba proposta lei ne’e,” nia informa.
Nia hatutan katak bainhira ezbosu lei ne’e preparadu ona, sei aprezenta ba Konsellu Ministru no hetan aprovasaun husi Parlamentu Nasionál molok implementa.
“Bainhira ita iha ona lei, ita bele aplika ona ba traballadór doméstiku no empregadór ka donadekaza atu kumpri regra ne’ebé iha,” nia konklui.
Jornalista: Felicidade Ximenes
Editór: Xisto Freitas da Piedade
