KOVALIMA, 29 Abríl 2025 (TATOLI) – Konsellu kombatente libertasaun nasionál munisípiu (CMLN), Kovalima, no líder komunitáriu sira husu ba diretór Servisu munisipál agrikultura (SMA) atu kontrola funsionáriu sira liliu estensionista ne’ebé destaka iha postu no ba to’o suku sira.
Sekretáriu CMCLN Kovalima, Joaquim Barros “Sikatlet”, husu dirijente agrikultura Kovalima atu kontrola, tanba esténsionista sira la tuun ba terrenu atu fó asisténsia téknika ba agrikultór sira iha to’os no natar.
“Ami preokupa tanba ami mai husi agrikultór maske destaka ona funsionáriu estensionista husi postu ba to’o ona suku nunka tuun ba iha terrenu hodi fó apoiu agrikultór atu hasa’e produsaun iha rai-laran”, Joaquim Barros “ Sikatlet”, ko’alia, bainhira partisipa iha reuniaun KKM iha salaun AMC, ohin.
Veteranu hato’o bazeia ba realidade ne’ebé akontese iha postu administrativu tanba maske kada tinan Governu prevee orsamentu maibé tenke uza nia funsaun, razaun estensionista sira barak tama servisu la ho disiplina.
Iha sorin seluk, Xefe suku Fatululik, Carlos Mendonça mós kestiona SAM Kovalima tanba kada tinan prevee orsamentu boot no koloka estensionista ba to’o suku no postu maibé programa la la’o.
“Ita haree, aloka orsamentu ba agrikultura osan boot maibé ita haree programa la la’o. Ha’u foti ezemplu hanesan iha suku Fatululik no Postu administrativu Fatululik maibé programa la la’o nune’e halo komunidade kontinua menus hasa’e produsaun”, nia reforsa.
Ho nune’e hanesan líder komunitária fó hanoin ba dirijente agrikultura atu kontrola estensionista ne’ebé mak Governu destaka ba to’o ona suku atu fó asisténsia téknika ba agrikultór sira.
Kona-ba kestaun ne’e, Diretór servisu agrikultura munisípiu Kovalima, Lino Magno rekoñese no hateten, maibé hanesan dirijente husu atu xefe suku sira mak atu kontrola sira.
“Loos. Ita-boot sira mak kontrola no ha’u entrega ba ita-boot atu kontrola sira-nia servisu iha suku no postu administrativu sira no ita-boot sira mak servisu hamutuk”, nia dehan.
Razaun xefe suku sira atu kontrola, tanba funsionáriu – esténsionista sira-nia lista prezensa xefe suku sira mak asina, presiza kontrola nune’e bele hasa’e produsaun iha rai-laran.
“Atu hasa’e produsaun iha rai-laran, ami fasilita de’it tékniku maibé ita-boot sira mak servisu hamutuk ho povu atu hasa’e imi-nia produsaun”, nia afirma.
Bazeia ba dokumentu ne’ebé TATOLI asesu iha esbosu proposta Orsamentu jerál Estadu 2026 aloka ba Servisu munisipál agrikultura Kovalima hamutuk $ 761,743.00, aloka ba saláriu no vensimentu $ 401,763.00,bens no servisu $ 2,19,980.00 no kapitál menór $ 140.000.00.
Notísia relevante:Ba agrikultór Kovalima, fila rai gratuita
Jornalista:Celestina Teles
Editór: Rafael Ximenes de A. Belo
