DILI, 30 Abríl 2025 (TATOLI)-Membru Konsellu Imprensa, ohin hili ona sira-nia Prezidente mak António Cesar Moniz Mali ba períodu 2025 – 2029 hodi troka Otelio Ote.
Eleisaun ne’e realiza liuhusi enkontru dahuluk hafoin eleitu liuhusi konferénsia jornalista sira no na’in ba mídia no mós reprezentasaun na’in-rua husi Parlamentu Nasionál.
Jornalista husi NHK-Japaun ne’e konsidera konfiansa ne’ebé membru sira atribui hanesan responsabilidade ida la’ós oportunidade. “Ami hakaas-an hodi alkansa ami-nia objetivu tanba públiku merese asesu ba informasaun ne’ebé klaru”, dehan membru husi TLPU (Timor-Leste Press Union) ne’e hafoin eleitu.
Fundadór TLPU ne’e hatete sei garante liberdade imprensa ba jornalista sira, maibé ho responsabilidade. “Ezije mós responsabilidade bainhira hala’o profisaun”, afirma.
Nia dehan sei kumpre kompromisu konaba zero toleránsia ba intervensaun servisu jornalista sira iha terrenu.
Iha fatin hanesan Prezidente sesante KI, Otelio Ote, esplika prosesu ne’ebé la’o tuir estatutu KI artigu 23.
“Depois prosesu ida-ne’e ami sei hato’o karta ofisiál ba Parlamentu Nasionál kona-ba rezultadu eleisaun, depois sei públika iha Jornal Repúblika no ikus sei ajenda iha Parlamentu Nasionál kona-ba tomada pose. Bainhira prezidente eleitu no nia membru nain haat simu ona tomada pose, Prezidente atuál ramata nia mandatu husi 2021-2025”, Ote akresenta.
Prosesu eleisaun, Isabel Maria Fernandes ho Cesar Mali, kada ema hetan votu rua, enkuantu membru seluk hanesan Suzana Cardoso hetan votu-ida.
Ho rezultadu impata ida-ne’e, Cesar Mali ho Isabel Fernandes hakat ba segunda volta ho rezultadu finál mak Cesar Mali ho votu-tolu, enkuantu Isabel Fernandes kontinua ho votu-rua.
Membru KI ba períodu 2025 – 2029 mak Cesar Moniz Mali ho Joaquim de Fátima Coutinho, reprezentante husi jornalista, Suzana Cardoso reprezenta orgaun Komunikasaun Sosiál (Na’in ba mídia) enkuantu Benevides Correia Barros ho Isabel Fernandes re-eleitu ba mandatu daruak husi Parlamentu Nasionál.
Notísia relevante: PN sei hili kandidatu reprezentante PN ba Conselho de Imprensa
Jornalista : Osória Marques
Editora : Rita Almeida
