Estudante UCT na’in-ualu sei hala’o estájiu iha Xina
DILI, 30 Abríl 2025 (TATOLI)—Reitór Universidade Katólika Timorense (UCT, sigla portugés), Padre Joel Casmiro Pinto, hateten fundasaun GX Xina nian sei fasilita estudante UCT na’in-ualu atu halo estájiu durante semana-rua iha Xina.
“Fundasaun GX sei selesiona estudante na’in-ualu husi na’in-30 atu hala’o estájiu laboratóriu semana rua iha Hong Kong no Xina iha fulan-Dezembru tinan-ne’e”, dehan Reitór ba jornalista sira iha Lecidere, kuarta ne’e.
Padre dehan fundasaun GX mai UCT iha tinan kotuk. Ne’ebé atu ajuda iha área saúde nian hodi ajuda sosiedade no estudante sira.
Padre Joel subliña organizasaun ne’e mós prepara ekipamentu atu kombate susuk no filtra bee-hemu iha UCT no Arkidioseze.
“Bee-hemun ho hanoin atu hamenus utilizasaun lixu plástiku. Ida ne’e kontribui atu ultrapasa krize ekolojia, tanba ne’e mak Fundasaun GX ajuda Timor liuhusi joven sira”, nia hateten.
Organizasaun ne’e mós envolve estudante UCT na’in 30 ne’ebé tuir formasaun kada findesemana husi Fevereiru to’o Maiu iha ne’ebé sira fahe ba grupu rua ho ema na’in 12, maske nune’e, Fundasaun GX nafatin fó sertifikadu ba estudante sira ne’ebé kualifikadu.
Prezidente Fundasaun GX, Leung Chung-Ying hateten organizasaun nia misaun no vizaun mak atu kombate susuk, fornese bee-moos no hakbi’it juventude sira.
“Ami sei hili estudante sira atu halo estájiu iha Hong Kong no Makau. Ida ne’e maka kontribuisaun boot liu hosi Fundasaun GX ba Timor-Leste”, nia reforsa.
Nia hatutan: “ami hanesan organizasaun karidade ida, ami hakarak halo misaun ida ne’e iha Timor-Leste, tanba ne’e ami hakarak servisu hamutuk ho estudante sira UCT nian iha área saúde nian no halo monitorizasaun ba projetu ida ne’e hanesan koordenasaun no laran-di’ak ida entre povu Xina no Timor-Leste”.
Estudante, Maria Nandita, hateten nia aprende buat barak husi fundasaun GX kona-ba oinsá atu halo ligasaun no komunikasaun ho ema.
Tuir nia, estudante universitáriu sira aprende husi fundasaun GX oinsá halo monitorizasaun no aprosimasaun ba populasaun sira, ezemplu iha Ataúru hodi fahe ekipamentu kombate susuk no lalar.
“Atividade fundasaun GX ne’e halo ha’u, nu’udar médiku futuru, konsiente kona-ba ita-nia sensibilidade ba ema sira ne’ebé hale’u ita ka sira ne’ebé besik ita, ita la’ós ajuda de’it, ita sente ema nia nesesidade no ita akompaña ema nia sofrimentu”, nia hakotu.
Notísia relevante: GX Fundation hosi Xina reafirma apoiu setór saúde Timor-Leste
Jornalista : Osória Marques
Editora : Rita Almeida
