DILI, 30 Abríl 2025 (TATOLI) –Sekretariu Estadu Floresta, Fernandino Vieira da Costa, informa katak tinan ne’e sei distribui viveiru rihun tolu-nulu ba territóriu nasional, liuhusi servisu Diresaun Jerál Floresta nian, hodi hamenus risku dezastre naturál sira, tanba laiha ai-horis hodi satan netik rai sira.
Nia hatutan, orsamentu atu konsentiva ba kuda ai-oan ba komunidade sira ita laiha orsamentu ba ida-ne’e maibé ita prepara de’it viveirus hanesan viveirus komunitária, viveirus permanente ho sentru viveiru sira-ne’ebe estabelese iha territóriu tomak ba apoiu implementasaun ne’e.
“Orsamentu própriu para ajuda apoiu ba komunidade sira hodi kuda ai-oan ida-ne’e laiha, Governu prepara de’it ai-oan sira hodi fornese ba komunidade”, Sekretáriu Estadu Floresta, Fernandino Vieira da Costa, hateten ba jornalista sira iha Beach Garden Otél, Praia dos Coqueiros, Dili, ohin.
Sekretáriu Estadu ne’e informa, distribuisaun viveiru sira-ne’e iha oioin hanesan, tipu viveiru komersiál, viveiru protesaun no konservasaun ai-fuan no ai urbana, ne’ebe Governu prepara liuhusi Diresaun Jerál Floresta hodi tinan-tinan distribui ba komunidade sira.
Ai komersiál kompostu husi ai-teka, ai-saria, ai-mahoni, ai-kameli no ai-kaharu, ne’ebé sai hanesan viveiru ne’ebé iha valór ekonomia nasionál no internasionál ne’ebé di’ak teb-tebes, enkuantu tipu ai konservasaun sira hanesan, ai-kakeu, ai-samtuku, ai-hali no seluktan hanesan ai-kakeu hodi sai mahon.
Prepara mós ai-fuan hanesan, rambutan, durian, sabraka, avokate no seluktan. Aifuan sira-ne’e prepara ba iha sentru viveiru no mós viveiru komunitaria hodi fahe ba komunidade ho gratuitamente.
“Viveirus permanente ita estabelese iha Munisípiu tolu, Lautein; ne’ebé koloka iha Pato, Munisípiu Vikeke koloka iha Raitahu no Munisípiu Manufahi koloka iha Betanu. No, sentru viveirus permanente sei koloka iha Maubara no Likisá. Aleinde ne’e viveirus permanente no sentru viveirus balun laiha munisípiu sira-ne’ebé mak ita estabelese viveirus komunitária”, governante ne’e informa.
Notísia relevante:Tinan oin, Agrikultura Oekusi dezenvolve sentru viveiru iha Pássabe
Jornalista: Alexandra da Costa
Editór: Rafael Ximenes de A. Belo
