OEKUSI, 27 Marsu 2025 (TATOLI) – Sekretária Rejionál ba Asuntu Agrikultura, Rejiaun Administrativa Espesiál Oekusi Ambeno (RAEOA), planu dezenvolve sentru viveiru ne’ebé lokaliza iha suku Abani, sub-rejiaun Pássabe iha Planu Asaun Anuál (PAA) Orsamentu Jerál Estadu (OJE) 2026 hodi fornese ai-oan ba agrikultór sira.
Sekretária Rejionál ba Asuntu Agrikultura, Filomena Sila, hato’o nia promesa ne’e, hafoin hala’o vizita ofisiál bá sentru viveiru iha suku Abani, sub-rejiaun Pássabe, kinta ne’e.
Notísia relevante:Sentru viveiru iha RAEOA prepara ai-oan rihun 11-resin
“Sentru ne’e harii iha autoridade anteriór nia kondisaun, ohin, ita haree la funsiona uluk Governu gasta osan barak, maibé daudaun abandona hela tanba ne’e ita sei propoin atu entegra iha Planu Asaun Anual OJE 2026 atu hadi’a, nune’e bele fornese ai-oan ba agrikultór sira iha sub-rejiaun Pássabe liuliu suku Abani no Malelat,” nia hateten, ba jornalista sira iha Pássabe.
Tuir nia haree, katak problema prinsipál ne’ebé akontese iha sentru viveiru ne’e mak presiza bee-moos no morru protesaun, nune’e bele garantia ai-oan sira.
“Ohin, ha’u haree bee-moos mak laiha, ha’u sei ko’alia ho Xefe Departementu Floresta atu haree kestaun ne’e no mós ita presiza halo lutu haleu no tékniku sira sei mai haree direita atu ita bele enkaixa iha Planu Asaun Anuál tinan oin (2026), ita bele uza sentru ne’e atu fó responde ai-oan ba suku rua, Abani ho Malelat la presiza ba to’o diresaun,” nia promete.
Iha fatin hanesan, Xefe suku Abani, Carlos Elo, hateten sente preokupa tanba sentru viveiru ne’ebé lokaliza iha suku Abani abandonadu kuaze tinan ida ona, tan ne’e nia espera Autoridade presiza hadi’a.
“Durante ne’e ha’u nia komunidade sira mós haree sentru ne’e preokupa tanba funsiona hodi rezulta ai-oan sira mate hotu, entaun ba oin presiza mak bee ne’e de’it, tanba durante tinan ida ona ami kuandu presiza ai-oan ba direita to’o Oekusi-Vila”, nia afirma.
Entretantu, daudaun ne’e entru viveiru ne’ebé ejiste iha Oekusi hamutuk haat ne’ebé destaka ona iha sub-rejiaun Oésilo, Pássabe, Níitbe no Pante Makasar.
Notísia relevante:Agrikultór iha Asumanu husu MAPPF kria sentru viveiru
Jornalista: Abílio Elo Nini
Editór: Florencio Miranda Ximenes
