iklan

OEKUSI

Sentru viveiru iha RAEOA prepara ai-oan rihun 11-resin

Sentru viveiru iha RAEOA prepara ai-oan rihun 11-resin

Imajen/Abilio Elo Nini

OÉ-CUSSE, 04 Fevereiru 2025 (TATOLI)–  Sentru Viveiru liuhusi Diresaun Rejionál Agrikultura, Rejiaun Administrativa Espesiál Oé-Cusse Ambeno (RAEOA), prepara ai-oan hamutuk 11.800, hodi  kuda iha bee-matan 42 iha tinan 2025.

Diretór Diresaun Rejionál Agrikultura, Oé-Cusse, Amaro Efi, informa, ai-oan sira-ne’e balun dsitribui ona ba komunidade no balun sei iha faze dezlokasaun husi parsériu dezevolvimentu sira.

Notísia relevante:MAP apoia ai-oan 6000 refloresta no konserva bee-matan 114 iha RAEOA

Imajen/Abilio Elo Nini

“Ai-oan ne’ebé ita prodús iha 2024 prepara atu distribui hamutuk 11.800, ai-oan sira ne’e ita agora koloka ona atu konserva ka kuda iha bee-matan 42, husi Diresaun konserva bee-matan 12 no husi parseriu sira-nian konserva bee-matan 30, ita mós fornese hela ai-oan ba komunidade ne’ebé mak presiza duni atu kuda iha toos, hanesan ai-mahoni no baunilla,” Diretór Amaro Efi, dehan iha Oé-Cusse, ohin.

Diresaun Agrikultura antes ne’e selebra akordu ofisiál ho parseiru dezenvolvimentu sira husi Organizasaun Naun Governamentál Binibu Faef Nome (BIFANO) no Sentru Edukasaun Sivika Enklave Oé-Cusse (CECEO) no World Neighbors WN.

Akordu ne’e ho objetivu atu kuda ai-oan hirak-ne’e hodi  garante kualidade debitu bee-matan sira, tanba durante ne’e agrikultór sira seidauk iha konsiénsia hodi taa ai-arbiru, nune’e afeta ba bee-matan sira ameasadu maran iha bai-loron.

Notísia relevante:BIFANO konsege konserva bee-matan 13 iha Oé-Cusse

Distribuisaun ai-oan sira ne’e bazea pedidu husi Autoridade komunitáriu, la’os fahe gratuita, nune’e hasa’e konsiénsia ba responsabilidade.

“Ita la define suku maibé ita atende liuhusi pedidu, diresaun agrikultura ita hakarak fahe maibé kuandu laiha konsiénsia atu kuda entaun bele estraga de’it, tan ne’e mak ita tenke hein pedidu mak foin ita fó, ne’e signifika katak, sira presiza duni ai-oan mai husu atu sira-bele kuda, iha toos no kuda atu konversa bee-matan sira,” nai dehan.

Bee-matan 42 ne’e, hetan kontrolu mós husi guarda floresta sira, tanba bee-matan sira-ne’e koloka iha sub-rejiaun haat hanesan  Oésilo, Pássabe, Nítibe no Pante Makasar

Ai-oan 11.800 ne’e kompostu husi espesie 22 mak hanesan, abokate, sabraka, samtuku, bua, au, rambutan, dragon, kamí, kakau, vetiver grass, mahoni, jambu, hali-portu, figus, ai-kameli, ai-nitas, kulu-jaka, malus, nimba, nú, ai-kasi, sukaer, ai-mahoni, baunilla no seluktan.

Notísia relevante:BIFANO identifika kauza dezastre naturál iha Oé-Cusse tanba falta konsiénsia umanu

Jornalista: Abílio Elo Nini

Editór: Florencio Miranda Ximenes

iklan
iklan

Leave a Reply

iklan
error: Content is protected !!