DILI, 30 Abríl 2025 (TATOLI)—Vise-Prezidente Komisaun G iha Parlamentu Nasionál (PN) ne’ebé trata asuntu Edukasaun, Juventude, Desportu no Sidadania, Gabriel Soares, enkoraja órgaun komunikasaun sosiál atu kontinua divulga informasaun ba povu iha prosesu dezenvolvimentu país.
“Ita haree liberdade imprensa iha mundu no espesialmente Timor-Leste la’o kapas tebes, ita haree komunikasaun liberdade espresaun husi komunidade no parte hotu jornalista sira tun rekolla informasaun ba problema sosiál, polítiku, edukasaun la’o pro-ativu di’ak tebes no jornalista sira mós iha votande di’ak oinsá atu halo kobertura, liuliu ba asuntu sosiál, maski iha difikuldade balun ne’ebé seidauk kobre hotu iha territóriu laran tomak,” Deputadu Gabriel Soares hato’o iha ámbitu komemorasaun loron Mundiál Liberdade Imprensa ne’ebé sei komemora iha 03 Maiu.
Deputadu ne’e konsidera papel mídia importante tebes atu halo kontrolu sosiál.
“Ein jerál mídia nia serbisu la’o di’ak tebes no mídia konsege elabora no halo kobertura ba to’o iha fatin-fatin hodi rekolla informasaun kona-ba povu iha área remota no estremamente remota,” nia apresia.
Notísia relevante : Komisaun G husu KI eleva index liberdade imprensa
Deputadu husi Bankada Congresso Nacional de Reconstrução de Timor (CNRT) ne’e dehan, maski Timor-Leste nia índise liberdade imprensa iha tinan kotuk tun maibé ne’e la’ós obstákulu boot.
“Ita-nia dejezu di’ak liu ita hadi’a duke ita sa’e maka’as liu mak ita tun fali, entaun aliserse ladún metin, agora nia persentajen ki’ik ka boot, ida-ne’e la’ós sai obstákulu ba mídia, maibé ida-ne’e atu motiva mídia liuliu jornalista sira hodi hala’o serbisu di’ak liután,” nia dehan.
Iha fatin hanesan, Deputadu Bankada Opozisaun Frente Revolusionária de Timor-Leste Independente (FRETILIN), Joaquim do Santos, hateten, Konstituisaun garante liberdade imprensa no liberdade espresaun.
“Governu presiza kria kondisaun ba ita-nia órgaun komunikasaun sosiál sira ne’e para sira bele ezerse sira-nia direitu kontrolu sosiál no organizasaun sira ne’ebé hola parte iha informasaun presiza kria kondisaun ba sira-nia membru sira sai profesionál iha kontrolu sosiál,” nia tenik.
Deputadu mós husu ba mídia no jornalista sira atu kontinua garante imparsialidade informasaun tuir kódigu étika no lei komunikasaun sosiál ne’ebé iha no órgaun reguladór tenke pro-ativu liután iha kontrolu.
“Ha’u-nia mensajen, husu ba maluk jornalista sira atu hato’o informasaun faktuál, realístiku, no verifika,” nia hato’o
Jornalista : Nelson de Sousa
Editora : Julia Chatarina
