DILI 30 Abríl 2025 (TATOLI)-Governu liuhusi Ministériu Asuntu Kombatente Libertasaun Nasionál (MAKLN) ho Konsellu Kombatente Libertasaun Nasionál (CCLN-sigla portugés), rejista reklamasaun ba kombatente rejistadu tinan 2009 provizóriu hamutuk rihun 54-resin iha territóriu.
Tuir Prezidente CCLN, Vidal de Jesus “Riak Leman, lista reklamasaun ne’e sei la simu tan ona, ida-ne’e hein parte relevante halo prosesu verifikasaun dadus, nune’e bele anúnsia ba públiku ba ida-ne’ebé mak direitu ba pensaun ne’e.
“Ita simu no rejistu ona ita-nia veteranu ne’ebé halo reklamasaun iha territóriu ne’e hamutuk rihun 54-resin. Ida-ne’e para ona iha ne’e tanba ita fó sira halo reklamasaun ba daruak nian ona, ne’ebé ami sei tuur hamutuk ho Ministru Asuntu Kombatente Libertasaun Nasionál, Oan Soru, atu prosesa ona nune’e bele iha rezultadu ne’ebé di’ak no tuir duni sira-nia partisipasaun iha ai-laran”, Riak Leman hatete ba TATOLI via telefone, ohin.
Entertantu MAKLN, Gil Monteiro Oan Soru, hatete publikasaun lista editál ida ne’e tuir prazu legál durante fulan-tolu, sura hosi loron 15 fulan-Janeiru to’o loron 15 fulan-Marsu. Maske prazu ne’e remata ona, maibé iha reklamante balu maka ninia dokumentu ka dadus sira seidauk hetan assinatura hosi sira-nia testamuña.
Tanba ida-ne’e maka liuhosi alargada iha loron 17 fulan-Marsu liubá, ministériu ho konsellu administrasaun CCLN no komisáriu sira deside halo estensaun tempu ba prazu fulan-ida tán. Prazu fulan-ida ne’e hahú fila-fali hosi loron 18 fulan-Marsu to’o loron 17-fulan-Abríl foin lalais.
“Durante estensaun prazu fulan ida-ne’e, MAKLN ho CCLN fó mós biban hodi haree fila-fali mós ba dadus pendente sira iha 2003 ho primeiru-rejístu tinan 2009 nian. Husi prazu sira ne’e, ikus mai ekipa sira rejísta totál reklamasaun 54,878 ne’ebé mak maihosi munisípiu 12 no Oekusi. Maibé, dadus sira ne’e sei provizóriu tanba metade hosi Dili seidauk submete hotu mai nasionál inklui munisipiu Ermera tomak, responsável sira CCLM nian seidauk enkamiña dadus mai nasionál”, Oan Soru dehan.
MAKLN ho CCLN iha loron 15 fulan-Janeiru 2025, anúnsia lista editál kombatente sira ne’ebé rejistadu iha segundu rejístu tinan 2009 nian, ho ema hamutuk 92.591 ne’ebé assina no ofisializa hanesan rekoñesimentu Estadu nian hodi taka sai lísta iha sede konsellu munisipál CCLN, administrasaun munisípiu no postu administrativu sira iha territóriu nasionál.
Entretantu, tuir dadus veteranu rejistadu 2009 iha teritoriu nasionál hamutuk ema na’in-124.680.
Liuhosi konteúdu ne ebé mensiona iha estatutu kombatente libertasaun nasional, lei númeru 3/2006, no artigu 13 hateten rejistu kualidade hanesan kombatente libertasaun nasionál sei kontinua hala’o validasaun rejistu ba períodu daruak nian ba rekoñesimentu kombatente hanesan libertasaun nasionál ne’ebé rejista iha tinan 2009.
Notísia relevante: MAKLN estende reklamasaun no kontestasaun inklui dokumentu pendente 2003
Jornalista : Osória Marques
Editora : Rita Almeida
