PJR nomea Prokuradór Rogério Viegas substitui Prokuradora Benvida atende kazu Zizelma
DILI, 29 Abríl 2025 TATOLI)—Prokuradór Jerál Repúblika (PJR), Alfonso Lopez, informa nia nomea ona Prokuradór Rogério Viegas hodi substitui Prokuradora Benvinda do Rosário atende kazu Zizelma Maria de Fátima Verdial Gonçalves.
“Kazu ne’e ita halo ona substituisaun ba prokuradór no agora prokuradór halo ona rekursu,” PJR Alfonso hateten ba TATOLI iha Palásiu Prezidensiál, Bairro-Pité, tersa ne’e.
PJR ne’e hateten, Prokuradór Titulár Rogério Viegas submete ona rekursu hodi kontra desizaun Tribunál Judisiál Primeira Instánsia ne’ebé aplika pena prizaun tinan-tolu no suspende ba tinan haat ba arguidu MSC ne’ebé envolve iha kazu omesídiu neglijente ne’ebé hamate Zizelma iha 13 Marsu 2025.
“Sim, ita kumpri ona. Ami submete ona rekursu ba Tribunál Rekursu no agora daudaun Tribunál Rekursu halo hela analiza ba rekursu,” nia tenik.
Notísia relevante: Asistente ba matebian Zizelma submete ona rekursu hodi kontesta desizaun Tribunál
Rekorda fali katak iha loron 13 Marsu 2025 tuku 20:00 kalan, Zizelma hetan soke husi arguidu MCS bainhira arguidu kondús motorizada ho Mio Beat ho velosidade maka’as, nune’e bainhira Zizelma foin atu korta dalan iha zebra cross nia leten besik Loja Funan Buras, Zizelma hetan kedas soke husi motór ne’ebé kondús husi arguidu MCS, rezulta Zizelma monu kedas iha fatin tanba hetan pankada maka’as no ikus hakotu iis.
Nune’e, ho asidente ne’e, arguidu MCS polísia detein oras 72. Iha loron 28 Marsu 2025, Tribunál Primeira Instánsia Dili halo prosesu sumáriu ba kazu ne’e no liuhusi Juíz Titulár, José Gonçalves, aplika pena prizaun tinan tolu no suspende ba tinan haat ba arguidu MSC no Tribunál husu ba arguidu selu indemnizasaun sivíl ba vítima Zizelma nia família ho valor osan rihun-lima.
Ho desizaun ne’e, halo família matebian Zizelma la simu no hamosu konfrontu iha Tribunál Primeira Instánsia Dili, nune’e rezulta arguidu MSC nia biin hetan kanek grave to’o lori halai ba Sentru Saúde Vera-Krúz hodi halo tratamentu.
Jornalista: Natalino Costa
Editór: Xisto Freitas da Piedade
