DILI, 01 Maiu 2025 (TATOLI)-Tuir antigu Primeiru Ministru, Mari Alkatiri, bainhira hasa’e saláriu traballadór husi $115 ba $200 mak bele dignifika sira-nia moris ho situasaun agora ne’ebé sasán nia folin aumenta iha merkadu.
Sekretáriu Jerál partidu Frente Revolusináriu Timor-Leste Independente (Fretilin) ne’e haktuir, momentu ne’eba bainhira ko’alia ho Ramos Horta katak atu aumenta saláriu presiza estudu ekonómiku.
“Ha’u nia opiniaun iha tempu ne’ebá atu hasa’e saláriu, tenke iha estudu ekonómiku ida, maibé mós tenke iha polítika dezenvolvimentu ida sustenta ba aumentu ida-ne’e”, lider opozisaun ne’e hatete iha semináriu-ida ne’ebé realiza iha ninia gabinete eis-titulár Faról, kinta-ne’e.
Semináriu ho tema “Os valores e a política da FRETILIN para significa os trabalhadores Timor-Leste” ne’ebé partisipa husi estudante universitáriu sira, Alkatiri hatutan: “Uza osan minarai halo aumentu para ema bele moris dignu uituan”.
Nia akresenta aumenta saláriu presiza haree mos retornu, se-la’e empregadór sira mak bankrota mak servisu na’in sei lakon ninia kampu traballu.
“Ita bele ho situasaun ida-ne’e, ha’u nia pozisaun mak tenke dignifika ita-nia traballadór ho sálariu $150 ka 200”, nia konklui.
Notísia relevante: Traballadór preokupa ho saláriu, tempu, komunikasaun no tratamentu – Loron mundiál traballadór
Jornalista : Natalino Costa
Editora : Rita Almeida
