VIKEKE, 02 Maiu 2025 (TATOLI)—Xefe suku Makadike Uaitame, postu Uatulari, munisípiu Vikeke, José Pinto Soares, hateten abitante suku Makadike Uaitame susar tebes asesu fasilidade saúde tanba tenke la’o ho distansia ne’ebé do’ok hafoin asesu ba fasilidade saúde.
“Kona-ba fasilidade saúde ba suku Makadike Uaitame ami halo ona iha aldeia Bubulita, maibé seidauk finaliza. Nune’e, agora daudaun ami propoin ona pesoal saúde tau iha postu saúde Bulita. Maibé, to’o agora seidauk kolaka, nune’e ami-nia komunidade atu asesu ba postu saúde tenke la’o distánsia dook husi suku mak foin sira bele hetan tratamentu,” José Pinto Soares hateten ba Agencia Tatoli iha postu Vikeke Vila, ohin.
José hatutan, bainhira abitante sira moras tenke halai ba postu saúde Ulusu, área suku Matahoi kuaze kilómetru ida-resin, kuandu moras emerjénsia liu abitante sira tenke la’o ba postu saúde Laisorulai, munisípiu Baukau kuaze kilómetru tolu (3) foin hetan tratamentu.
“Ha’u sente área saúde sai mós difikuldade ida ba ha’u-nia komunidade ne’ebé hela ih área rurál. Tanba ne’e, ha’u husu ba parte Ministériu Saúde hodi tau atensaun ba ami-nia suku hodi koloka pesoál saúde ba ami-nia suku, atu atende ba ami-nia komunidade ne’ebé moras,” nia dehan.
Hatán ba preokupasaun ne’e, Diretór servisu saúde munisipál Vikeke, Aljacsono S. Maia, kona-ba suku Makadike Uaitame ne’ebé seidauk iha fasilidade no pesoál saúde Servisu Saúde Munisípiu Vikeke tau ona planu tinan 2026, tanba ne’e suku foun ne’ebé foin harii.
“Ami planu ona oinsá tau fasilidade saúde iha suku Makadike Uaitame ne’e tinan oin. Ha’u sei hatama relatóriu ba unidade jestaun projetu husi Ministériu Saúde tanba suku referida foin lalais mak estabelese. Nune’e ha’u tenke halo fali karta ida ba MS katak suku Makadike Uaitme hamrik mesak ona, ne’ebé ita presiza fasilidade saúde inklui pesoál saúde,” nia informa.
Diretór saúde ne’e profunda, maske seidauk iha fasilidade saúde maibé Servisu Saúde Munisípiu Vikeke sei orienta pesoál saúde sira halo mobilel klínika semana ida dala rua ka dala tolu hodi atende komunidade husi suku Makadike Uaitame bainhira kazu emerjénsia liga direta ba ambulánsia mak tula hodi halo transferénsia.
“Ba suku Makadike Uaitame ne’ebé seidauk iha fasilidade saúde ne’e, ami iha meu alternativu ida hodi fó atendementu ba ita-nia komunidade, mak ami sei halo mobile klínika no moras emerjénsia ami orienta ambulánsia ba transporta pasiente sira,” nia dehan.
Tuir dadus, suku Makadike Uaitame ho totál aldeia neen uma kain 200 no totál abitante hamutuk 686.
Jornalista : Vitorino Lopes da Costa
Editór : Cancio Ximenes
