DILI, 02 Maiu 2025 (TATOLI)-Governu liuhusi Ministériu Ensinu Superiór Siénsia no Kultura (MESSK) husu Institutu Ensinu Superiór (IES) atu kumpre dekretu-lei númeru 2/2018, foin bele loke kursu dotouramentu iha Timor-Leste.
“Governu la bandu institutu ka universidade atu servisu ho universidade kualifikadu ne’ebé ho nível grau akadémiku di’ak liu, atu loke kursu dotouramentu depois atribui sertifikadu ba estudante sira, maibé ita nia rasik seidauk bele”, Ministru MESSK, José Honório da Costa Pereira, ba TATOLI iha knaar fatin Kolmera, sesta-ne’e.
Nia dehan dekretu-lei ne’e iha klasifikasaun haat mak ida bolu profesór asistente, rua profesór leitór, tolu profesór asosiadu no ikus profesór katedrátiku.
“Dalabarak péritu internasionál mai halo avaliasaun ba universidade sira-ne’e, no husu liafuan fasil ba sira dehan imi iha ona profesór katedrátiku sira ka lae? Ita tenke onestu haree ba situasaun tuir dekretu-lei 2/2018, 24 Janeiru. UNTL de’it mak kumpre hela no sira-nia dosente balun to’o ona profesór adjuntu asosiadu, dala ruma tinan lima mai tan no tinan 10 mak foin to’o profesór katedrátiku ne’e iha, la fasil atu iha, la’ós halimar nian”.
Ministru dehan rezolusaun ne’ebé Governu hasai hetan asinatura husi Xefe Governu, Kay Rala Xanana Gusmão. Tanba ne’e, institutu no universidade iha Timor-Leste tenke kumpre.
Ministru José Honório hatete Governu la bandu institutu no universidade nia kursu ne’ebé eziste ona. Loke kursu foun ne’ebé hanesan labele, por-ezemplu iha UNTL mak loke ona ekonómia jestaun entaun UNITAL labele loke tan.
“Ho ida-ne’e ha’u koordena ona ho ANAAA atu bainhira sira hatama proposta foun mai ministériu haree tiha depois lori ba ANAAA no halo avaliasaun mak deside katak kursu ne’e bele ona ka lae. Tanba ita kuandu fó tempu universidade no institutu loke kursu depois ANAAA ba halo avaliasaun kursu balun profesór laiha. Ha’u hanoin universidade sira hatene hela regra maibé sira nafatin loke ikus universidade mak vítima”, afirma.
Ministru husu tinan oin mak ekipa universidade no institutu ne’ebé halo sensibilizasaun ba postu administrativu no munisípiu kona-ba asesu universidade ne’e, karik estudante ne’ebé hakarak asesu universidade privada karik, esplika mós kona-ba kursu ne’ebé akredita iha universidade sira.
Notísia relevante: Governu suspende abertura siklu estudu foun iha Ensinu Superiór
MESSK ezekuta ona pursentu 20
Nia mós informa konaba ezekusaun Orsamentu Jerál Estadu 2025 iha trimester dahuluk atinje ona pursentu 20.
Ministru dehan ezekusaun trimestre dahuluk ba OJE 2025 MESSK nian atinje ona 20%, ekivale ba $1.405.447,62 ba bens servisu, saláriu no vensimentu.
OJE 2025 ba MESSK hamutuk $6,957,923 hodi aloka ba saláriu no vensimentu $2,756,849, bens no serbisu $1,201,074 no transferénsia públika millaun $3.
Orsamentu ne’e finansia ba programa dezenvolvimentu instituisionál ho sub-programa tolu no atividade 13.
Jornalista : Osória Marques
Editora : Rita Almeida
