DILI, 02 Maiu 2025 (TATOLI) – Vatikanu hahú instala xaminé ka suar-fatin iha topu Kapela Sistina nian ba preparasaun Konklave ne’ebé sei inisia iha loron 07 Maiu atu eskolla Papa foun.
Instalasaun xaminé ne’e halo husi korpu bombeiru Vatikanu nian, ne’ebé sei fó sai rezultadu ba eleisaun Papa foun.
“Iha telladu Kapela Sistina nian instala ona xaminé ne’ebé sei fó sai suar mutin ne’ebé anunsia eleisaun ba Papa foun, iha ne’ebé Konklave sei hahú iha loron 07 Maiu ne’e”, informa nota husi Santa Sé, ohin.
Nota ne’e esplika katak, iha dadeer (esetu loron 07 Maiu) no iha kalan, sei sai suar xaminé nian – metan hatudu katak seidauk iha Papa foun mak eleitu no mutin hatudu pelu menus Kardeál 89 mak konkorda ona kona-ba sé mak sei lidera Igreja Katólika.
Prosesu eleisaun ba Santu Padre foun realiza liuhusi Konklave, ne’ebé envolve kardeál sira. Kardeál hamutuk 133, ne’ebé menus husi tinan 80 no bele vota – sei tama iha Kapela Sistina atu fó nia votu ho segredu ba eskolla Papa foun.
Iha Kapela Sistina, kardeál 133 sei halo eleisaun sein komunikasaun ho mundu esteriór to’o Papa foun eleitu.
Iha prosesu eleisaun Papa foun, suar metan ka mutin ne’ebé sai husi xaminé mak meiu komunikasaun ba mundu esteriór katak para eleitu ona ka seidauk.
Bainhira Konklave hahú sei halo misa espesiál iha dadeer iha Bazílika São Pedro. Kardeál sira sei hakat bá Kapela Sistina atu halo juramentu hodi matein segredu. Kapela Sistina sei xave durante Konklave.
Notísia relevante: Kardeál sira deside sei hahú Konklave iha 07 Maiu
TATOLI
