DILI, 02 Maio 2025 (TATOLI)–Ministériu Solidariedade Sosiál no Inkluzaun (MSSI), sesta ne’e, organiza konsultasaun nasionál ba esbosu relatóriu hosi implementasaun konvensaun direitu ba Ema ho Defisiénsia (EhD) iha Timor-Leste, ne’ebé ratifika ona iha 2023.
“MSSI organiza Konsulta Nasionál ba Esbosu Relatóriu Inísiu hosi Implementasaun Konvensaun ba Direitu Ema ho Defisiénsia, ne’ebé Timor-Leste Ratifika ona iha tinan 2023”, Ministra MSSI, Verónca das Dores, dehan iha Otél Timor.
Ministra MSSI, Verónica das Dores ba jornalista sira iha ótel Timor hatete konsultasaun ne’e ho objetivu prinsipál mak aprezenta esbosu relatóriu inisiál Estadu Timor-Leste nia ba progresu implementasaun hosi konvensaun ne’e, depois TL ratifika.
“Oportunidade últimu ba ita hotu atu fornese informasaun nu’udar referénsia no pareser ba esbosu ida ne’e hodi eleva kualidade relatóriu ne’e”, nia dehan.
MSSI hamutuk ho parseiru dezenvolvimetnu halo konsultasaun ba esbosu relatóriu ba konsensaun diretu Ema ho Difesiénsia. Prosesu ne’e nu’udar esperiénsia dahuluk ba MSSI no ekipa hodi hakerek relatóriu ba ONU.
“Ida ne’e progresu signifikativu tebes, Maibé, MSSI mesak mós labele, tanba ne’e hakarak hato’o agradesimentu profunda ba apoiu no kolaborasaun hosi embaixadór ba asuntu ema ho defisiénsia hosi liña ministeriu sira hotu, ne’ebé apoiu ekipa hodi elabora, konsulta no konfirma dadus no informasaun sira”, ministra dehan.
Biban ne’e MSSI agradese ba finanseiru hosi parseiru dezenvolvimentu sira, liuliu ba UN – Women, UN Human Rights Adviser Unit no UNICEF, ne’ebe serbisu ho dedikasaun tomak hodi apoiu ekipa MSSI hosi outubru 2024 to’o agora.
Xefe UN Woman iha TL, Amy Nishtha Satyam, hatete governu TL kumpre atu ko’alia asuntu igualdade jéneru no inkluzaun, tanba konsidera importante tebes.
“Asuntu igualidade jéneru ne’e importante tebes, ita hotu hatene katak lori prosesu ne’ebé naruk hodi hamosu prosesu relatóriu ne’e”, nia dehan.
Nia apresia ba servisu ekipa ministra MSSI hodi hamosu esbosu relatóriu, dahuluk ba direitu ema ho defisiénsia. “Ida ne’e hanesan relatóriu ida ne’ebé primeiravez atu bele hatudu katak ita nia servisu hirak ne’e realiza duni”.
Notísia relevante: Governu kontinua toma atensaun ba desigualdade jéneru
Jornalista : Osória Marques
Editora : Rita Almeida
