OEKUSI, 02 Maiu 2025 (TATOLI) – Primeiru-Ministru, Kay Rala Xanana Gusmão konvida grupu Tebedai Tradisionál husi Suku Usitako, Sub-Region Nitibe, Rejiaun Administrativa Espesiál Oecusse Ambeno (RAEOA) atu hatudu atrasaun kultura Atoni nian iha konferénsia ASIAN Portuguese Community Conference (APCC) da-haat nian, ne’ebé sei realiza iha Díli, durante loron rua hahú husi 26 to’o 30 Jullu 2025.
Xefe Governu, hato’o nia promesa ne’e, iha diálogu ho komunidade sira iha suku Usitako, tanba sente animadu tebes, bainhira haree grupu dansa tradisionál sira uza atributu kulturál nian hanesan, tebe (bsótt), hatais tais, tara surik, uza osan mutin hodi simu bainaka sira nu’udar kultura Atoni-nian.
Foto Tatoli, I.P/Abílio Elo Nini
“Atu informa ba Prezidente Autoridade RAEOA no populasaun Oekusi katak iha fulan Jullu atu ramata, sei iha konferénsia bo’ot ida iha Dili, husi fatin bar-barak ne’ebé uluk Portugés sira mai liuhosi ne’eba, India iha mak Goa, iha Malazia, iha komunidade Malaka, iha Jawa iha komunidade Tugu husi Jakarta no mós iha Indonézia husi komunidade Flores, husi Tailandia, Myanmar, Srilanka, Macau sei mai iha ne’e, tanba sira ne’eba prezerva kultura nian no sira nia kultura rasik. Sei iha loron ikus atu halo festa bo’ot ida ne’ebé Timor mós sei aprezenta nia kultura, sira mós temi Oekusi Ambeno, no ha’u husu imi mak sei ba hatudu atrasaun kultura iha konferénsia ne’e,” Promete Xefe Governu.
Notísia relevante: Timor-Leste sai uma-nain APCC 2025 hodi prezerva patrimóniu kulturál portugés
Xefe Governu Sente animadu tebes bainhira haree grupu dansa tradisionál uza atributu kultura nian hanesan, uza atributu bsótt, tais, surik, uza osan mutin hodi simu bainaka sira.
Nune’e, Primeiru-Ministru bolu direita ekipa hirak ne’e atu koordena ho jestór sub-rejiaun Nitibe, Agostinho Afulit, hodi prepara ekipa sira-ne’e, sira-nia ekipamentu tradisionál hodi ekipa Xefe Governu fó orientasaun ba ekipa Sekretáriu Estadu Arte no Kultura (SEAK) sei kontaktu grupu hirak ne’e.
“Imi tenki preparaan didi’ak tanba nasaun barak sei mai, hatudu imi kultura nu’udar Oekusi-oan parte ida husi Timor-Leste,” Xefe Governu fó hanoin.
Entretantu, Xefe Governu rasik hala’o ona reniaun ho ekipa ASIAN Portuguese Community Conference (APCC) kompostu hosi Figura komunidade Portuguesa husi Malaka (Malázia), Joseph Santa Maria no mós figura komunidade Tugu, Norte Jakarta, Indonézia hodi deskute ajenda preparasaun ba konfrensia ne’e rasik.
Konferénsia ne’e sei realiza iha Dili, sei halibur komunidade Portugueza mai hosi rejiaun oioin, mak hanesan Malaka, Tugu, Maumere, Larantuka, Makau, Goa no Sri Lanka.
Tuir planu, iha konferénsia ne’e sei hamosu diskuasaun oioin, sei aprezenta atrasaun oioin hanesan buat ne’ebé mai hosi kultura Portugál nian.
Notísia relevante:Timor-Leste sai uma-nain APCC 2025 hodi prezerva patrimóniu kulturál portugés
Jornalista: Abílio Elo Nini
Editór : Florencio Miranda Ximenes
