DILI, 03 Maiu 2025 (TATOLI)—Prezidente Repúblika (PR), José Ramos Horta, hateten nia parte halo hela preparasaun resposta ba preokupasaun públiku nian relasióna ho nomeasaun kargu ba Prezidente Tribunál Rekursu, Afonso Carmona, ba mandatu tinan haat.
Notísia Relevante: PR Horta nomea Juíz Afonso Carmona asumi kargu Prezidente Tribunál Rekursu
“Ne’e ha’u la komenta agora, tanba Prezidensia Repúblika prepara hela resposta. Ne’e mak balun sei hakfodak, sira halo komentáriu opiniaun, la tuir estudu didi’ak dokumentasaun ne’ebé iha. Ba ha’u, situasaun klaru loos ne’e iha ha’u-nia mandatu konstitusionál. Tuir prezidente, ita-nia sistema Jurídiku no Portugés nian, atu nomea Prezidente Tribunál Rekursu. Ha’u hakarak aselera kriasaun Tribunál Supremu atu hamate tiha problema partidarizasaun, politizasaun ne’ebé barak loos iha ita-nia sistema judisiariu, liuliu iha Tribunál Rekursu,” PR Horta hateten ba jornalista sira Timor Plaza, sábadu ne’e.
Xefe Estadu ne’e dehan, atu labele iha partidu ida, sira nia elementu domina iha Tribunál nia laran.
“Ita temi públiku ne’e ita mak hatete, públiku, públiku saida, ita temi karik, elementu sira agora laiha poder ne’e. Sira laiha poder ne’e mak poder entaun ne’e loos. Ema ida mak ko’alia dehan públiku l’e, ha’u hatene la’ós públiku, ne’e ema pesoál ida mak ko’alia,” nia hateten.
Ema balun hakarak sira kontrola, tanba ne’e hanesan sira-nia kultura polítika no kultura idelojika, hakarak domina nafatin iha setór judisiál.
“Ha’u laiha partidu, ha’u tuir de’it konxiénsia ha’u nian, ha’u tuir de’it konstituisaun, no ha’u-nia fiar ba Estadu ida-ne’e, tenke hamate tiha partidarizasaun iha setór judisiáriu. Haree iha ne’ebá, se mak iha ne’ebá, elementu partidu nian, entaun mak públiku na’in-rua, tolu ne’e mak la kontente. Maibé, ha’u sei fó resposta, ha’u hein hela iha tempu própriu sei halo resposta kompletu,” PR Horta dehan.
Antes ne’e, Prezidente Repúblika, José Ramos Horta fó posse ba Prezidente Tribunál foun, Juíz Afonso Carmona (Antigu-Juíz Administradór Tribunál Distritál Dili) ho baze dekretu Prezidensiál, númeru 35/2025 de Abríl 2025, ne’ebé publika iha loron 29 Abríl 2025.
Notísia Relevante: PTR Afonso Carmona komprometidu hasa’e númeru juíz hodi reforsa STJ
Jornalista : Osória Marques
Editór : Cancio Ximenes
