DILI, 05 Maiu 2025 (TATOLI)—Vise-Ministru ba asuntu Parlamentár, Adérito Hugo da Costa, hateten, IX Governu Konstituisionál komprometidu kontinua dezenvolve lian portugés nu’udar lian ofisiál iha prosesu ensinu aprendizajen iha eskola sira iha territóriu.
“Ho partisipasaun ativu ne’ebé refleta Estadu Timor-Leste nian atu transforma iha prátika hodi dezenvolve ita-nia lian ofisiál iha nível eskola hotu iha territóriu nasionál tomak, nune’e ita-nia kompromisu ne’e tenke transforma ba prátika haree ba progresu dezenvolve língua portueza,” Reprezentante Governu ne’e hato’o bainhira partisipa iha komemorasaun loron Mundiál Portugés iha Parlamentu Nasionál (PN), segunda ne’e.
Nia dehan, hanesan país ne’ebé opta lian portugés nu’udar lian ofisiál no partisipasaun ativa iha organizasaun CPLP nian, husi Parlamentu rasik iha partisipasaun ativu mós iha membru Asembleia Parlamentár Komunidade Ko’alia Lian Portugés (AP-CPLP).
“Atividade Timor-Leste ne’e kontribui ba kontinuasaun ita-nia kompromisu atu dezenvolve lian portugés hanesan lian ofisiál iha kanál ida sériu tebes,” nia akresenta.
Notísia relevante : PM husu inan-aman enkoraja labarik sira aprende lian-portugés
Governante ne’e dehan, Timor-Leste nia partisipasaun ativu iha nível ezekutivu atu hanesan Prezidénsia ba CPLP no Parlamentu rasik ativu iha AP-CPLP, reflete kontinuasaun ba envolve partisipasaun ativu iha polítika dezenvolvimentu lian portugés própriu espesialmente iha Timor-Leste no iha país membru CPLP.
“Partisipasaun ativu nível Parlamentu liuhusi AP-CPLP no ita-nia kompromisu hodi prienxe ba obrigasaun hanesan país membru,” nia reforsa.
Jornalista : Nelson de Sousa
Editora : Julia Chatarina
